Prezidente Rede Feto, Yasinta Luzinha. Imajen TATOLI/Egas Cristovão.

DILI, 10 marsu 2021 (TATOLI)—Prezidente Rede Feto, Yasinta Luzinha, hateten konsumidór sira-ne’ebé hela iha sidade maiória dependénsia ba produtu importasaun tanba labele prodús ai-han ruma liuhosi to’os no natar.

“Konsumidór nia nesesidade loro-loron nian ne’e importante maibé ita labele prodús ai-han tanba hela iha sidade, entaun ita dependénsia de’it ba produtu importasaun nian de’it. Nune’e, presiza Governu tenke halo protesaun ba ai-han nia presu atu iha balansu,” Yasinta Luzinha hateten ba Agência TATOLI iha ámbitu atu selebra Loron Mundiál Konsumidór ne’ebé mundu selebra kada 15 marsu, liuhosi telefónika, tersa ne’e.

Nia hatutan, fatór importante mak ekonómia no rendimentu ida-idak nian maibé ema hirak ne’ebé hela iha sidade tuir lei traballadór ne’ebé regula ho mínimu $115 ne’e afeta ba nesesidade konsumidór loro-loron nian.

“Ita liga situasaun agora pandemia COVID-19, labele koresponde ba nesesidade loro-loron nian tanba dala barak kondisaun ema balun loron ida han dala rua eh dala ida. Maibé iha parte seluk, ema balun loron ida han dala tolu. Buat hirak ne’e akontese tanba konsumidór nia kapasidade atu sosa la to’o,” nia dehan.

Aleinde ida-ne’e, nia hateten, kampu traballu laiha mak mosu tan moras COVID-19, oinsá bele rekupera eh reforsa ema ne’e nia ekonómia iha família ida. Ezemplu, maluk balun halo esforsu lubuk hodi halo negósiu maibé saida mak akontese, lockdown ne’ebé hahú implementa 00h00 to’o semana ida, ne’e aumenta susar ba ema ne’ebé mak halo negósiu kiik-oan sira.

Nune’e, nia hateten, atu ko’alia kona-ba rekupera ekonómia, Timor-Leste daudaun ne’e setór agrikultura mak domina ho kontestu ida katak rai luan barak hodi bele halo produsaun ba ai-han oioin.

“Tanba, agora ho pandemia COVID-19, ita labele sosa produtu importasaun, nune’e ita tenke garante ita-nia setór agrikultura ne’e. Mak di’ak liu esforsu oinsá mak bele kontribui mós ba nasaun Timor-Leste. Tanba, ha’u fiar katak setór agrikultura bele koresponde situasaun ne’ebé Timor-leste enfrenta agora,” nia hateten.

Dezenvolve setór produtivu

Tanba ne’e, nia dehan, Timor-Leste presiza dezenvove setór produtivu maibé presiza iha koordenasaun entre ministériu interligadu no parseiru dezenvolvimentu inklui setór privadu no sosiedade sivíl sira, tanba ladún iha kolaborasaun mak dala barak hamosu iha fatin balun hetan direitu dobru.

Tuir nia, loloos ne’e parseiru dezenvolvimentu, setór privadu no sosiedade sivil sira tenke implementa saida mak Governu traxa ona, nune’e programa no planu Governu nian bele fó benefisiu ba konsumidór sira.

Governu, nia husu, tenke observa hela presu sasán sira atu nia efeitu labele ba konsumidór sira no Governu tenke asegura no halo protesaun ba presu ne’ebé mak tuir konsumidór nia kapasidade.

“Tanba ita maiória moris iha situasaun ne’ebé mak difísil, nune’e presu sasán tenke tuir estandarizasaaun. Nune’e, ba sira-ne’ebé rendimentu menus iha pandemia ne’e, bele hetan netik natoon hodi augenta,” nia dehan.

Ba konsumidór sira, nia dehan, presiza abitua no eduka-aan ba utilizasaun rekursu ne’ebé mak iha ho kontestu Timor-Leste iha produtu lokál oioin ne’ebé bele dezenvolve hodi konsumu rasik.

Iha loron 15 marsu, nasaun hotu iha mundu komemora loron mundiál ba direitu konsumidór sira nian. Komemorasaun ida-ne’e akontese tanba iha loron 15 marsu 1962, iha diskursu Prezidente Estadu Unidu Amérika (EUA), John Kennedy, sita hanoin importante no pertinente katak konsumidór iha nia direitu; direitu ba seguransa, direitu ba informasaun, direitu ba eskola, diretu hodi rona, nu’udar direitu fundamentál konsumidór sira nian.

Iha Timor-Leste, iha konstituisaun, iha artigu 53 ko’alia kona-ba Direitu Konsumidór Sira Nian katak; Konsumidór sira iha direitu atu simu sasán no servisu ne’ebé mak iha kualidade no mós atu hatene informasaun loos kona-ba sasán sira-ne’e atu proteje sira-nia saúde, seguransa no mós interese ekonómiku hanesan mós atu bele hadi’a buat ne’ebé aat.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here