Ministru Turizmu, Komérsiu no Indústria, José Lucas do Carmo da Silva. Imajen TATOLI/Egas Cristovão

DILI, 10 marsu 2021 (TATOLI)--Governu liuhosi Ministériu Koodenadór Asuntu Ekonómiku (MKAE) no Ministériu Turizmu, Komérsiu no Indústria (MTKI) kumpre rezolusaun Governu impoin serka sanitária iha munisípiu Dili, ne’ebé la bandu atividade ekonómika maibé jere ema labele halibur barak iha loja no restaurante.

“Ita haree hosi alterasaun rezolusaun Governu, la hapara atividade loja no restaurante sira, maibé oinsá ita jere labele hamosu ema halibur hamutuk barak iha estabelesimentu sira,” Ministru Turizmu, Komérsiu no Indústria, José Lucas da Carmo da Silva, hateten iha edifísiu Ministériu Finansa, Aitarak-Laran, Dili, kuarta ne’e.

Konsellu Ministru  delibera ona hodi halo alterasaun dahuluk ba rezolusaun Governu númeru 12/2021, loron 08 marsu, ne’ebé impoin serka sanitária no konfinamentu iha munisípiu Dili, hahú 09 to’o 15 marsu.

Iha alterasaun ne’e, fó kompeténsia ba MKAE no MTKI, liuhosi despaisu konjuta sei define atividade ekonómika no servisu saida maka tenke taka no define regra funsionamentu ba atividade sira seluk ne’ebé maka bele funsiona.

Ministru fó ezemplu, karik restaurante sira bele halo service delivery, nune’e hapara ema labele tama barak iha loja no restaurante sira.

“Ita haree alterasaun rezolusaun ne’e detallu no serve ona atu regula, bele regula ona, se seidauk detallu ita hamosu diploma ministeriál atu regula atividade iha parte ekonomia,” nia akresenta.

Aleinde ne’e, Ministériu Administrasaun Estatál hasai ona despaisu kona-ba regula funsionamentu atividade merkadu iha kapitál Dili.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here