Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristóvão

DILI, 10 marsu 2021 (TATOLI)–Portavós Governu no Ministru Prezidénsia Konsellu Ministru, Fidelis Manuel Leite Magalhães, apela ba públiku atu koopera ho autoridade kompetente no husu atu mantein kalma no lalika pániku tanba Governu sei halo esforsu asegura bem estar povu.

“Bainhira ita kompara ho tinan kotuk, agora iha faze nível alerta a’as liu tanba númeru transmisaun aumenta. Maski nune’e, durante tinan ida tomak ita aprende barak kona-ba natureza vírus, maibé ita preparadu liután kompara ho situasaun bainhira vírus hahú mosu. Tanba ne’e, ejize komunidade kolabora di’ak no tau konfiansa ba autoridade sivíl, militár, profisionál saúde, no individu seluk ne’ebé mak halo esforsu tomak tau-an ba risku atu garante bem estar públiku iha ita-nia rai,” Ministru Fidelis hateten liuhosi konferénsia imprensa, hafoin reuniaun ezekutivu iha salaun Ministériu Finansa (MF), Aitarak-laran, kuarta ne’e.

Notísia relevante: Pozitivu foun tolu iha Dili, pasiente COVID-19 aumenta ba 51

Governante ne’e rekoñese, aplikasaun Estadu Emerjénsia kria dezkonfrotu iha sidadaun nia moris, maibé kompara ho nasaun barak durante tinan ida nia laran (tinan kotuk) to’o agora Timor-Leste konsege hetan vitória boot, tanba seidauk iha ema mak mate tanba COVID-19 no númeru hada’et ladún a’as kompara ho nasaun seluk.

“Loron boot natál foin lalais ita iha previléju ida atubele selebra ho família no ita-nia atividade sira prátikamente la’o kuaze normál iha tinan ida tomak nia laran,” nia akresenta.

Tuir Portavós Governu, ezekutivu opta métodu proporsionál entre nível risku no resposta, ne’ebé bainhira identifika nível risku, Governu inpoin medida duru ba interese públiku.

“Governu rekoñese, iha situasaun ne’e barak mak sente la konfortável maibé ba nasaun nia di’ak no ba ita hotu ninia saúde, ita halo ho intensaun di’ak nune’e ita-nia rai labele lakon ema no sidadaun bele moris saudável to’o situasaun kontroladu iha nível mundiál,” nia hatutan.

Tuir dadus ne’ebé fó sai hosi Sala Situasaun Sentru Integradu Jestaun Krize (CIGC, sigla portugés) iha kuarta (10/03), rejista tan kazu pozitivu COVID-19 tolu, nune’e totál kazu ativu ne’ebé baixa iha sala izolamentu Vera Cruz no Tasi-tolu hamutuk 51.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here