Eufemia Godinho Correia. Imajen/Espesiál

DILI, 10 marsu 2021 (TATOLI)–Loron ba eskola, kalan ba serbisu iha restaurante. Esperiénsia ida ne’e mak lori Eufemia Godinho Correia ho naran estimada “Femia” to’o susesu. Susesu iha nia estudu, susesu iha nia karreira.

Susesu iha estudu tanba Femia finaliza ona nia estudu iha área téknika, Departamentu Informátika, iha Fakuldade Enjeñária, Siénsia no Teknolojia (FEST), Universidade Nacional Timor Lorosa’e (UNTL).

Susesu iha nia karreira tanba sai emprendedora ida, loke restaurante hodi oferese mós oportunidade serbisu ba ema seluk. Daudaun ne’e nia iha traballadór na’in haat, la sura ho nia alin sira.

Alumni UNTL ne’e haktuir, área estudu ne’ebé mak nia foti dook hosi área emprendedorizmu nian maibé tanba inisiativa rasik nia hahú halo negósiu.

“Hahú business (negósiu) ne’e joint ho prima tau hamutuk $700, maibé nia osan la to’o entaun tau de’it $300. Prima mak aumenta no loke warung (restaurante) iha Mandarin hodi aprende bussiness. Depois sente bele ona atu la’o mesak entaun husu lisensa ba prima buka fatin. Ikus hetan ona iha rezidénsia Farol mak foin loke rasik bussiness warung lalapan ne’e,” Femia informa ba Agência TATOLI, iha nia knaar fatin, foin lalais ne’e.

Eufemia Godinho Correia. Imajen/Espesiál

Aleinde ida ne’e, tuir Femia katak loke negósiu iha parte restaurante nian ne’e, nia mós serbisu voluntária ona iha Programa Nasaun Unida ba Dezenvolvimentu (UNDP, sigla inglés).

Durante sai hanesan voluntária, loron nia ba serbisu iha edifísiu UNDP nian maibé esperiénsia serbisu kalan iha restaurante bainhira sei eskola nia kontinua promove. La deziste. Esforsu no esforsu nafatin hodi prátika esperiénsia ne’ebé nia iha ona ikus mai hahú loke ona restaurante.

“Loron serbisu iha UNDP, kalan loke lalapan. Kliente aumenta barak beibeik entaun orsamentu iha ona mak hafoin hola tan sasán dapur hanesan meza, fugaun, no seluk tan aumenta mós funsionáriu sira, serbisu ajuda hamutuk na’in haat la konta ho alin sira. Kalan ida hetan rendimentu ne’ebé boot liu mak $200 tun ka ki’ik liu mak $70/80”.

Bainhira sei hanesan estudante ativu iha universidade, iha 2013, iha kalan, Femia oferese nia tempu no enerjia la suspira serbisu iha restaurante Quick-Club Colmera. Nia lakohi envolve iha atividade estra sira ka grupu ruma tan ta’uk osan la iha. Entaun, hakarak buka serbisu de’it.

Restaurante ne’e kalan loke hanesan mós diskoteka no nia koko badinas liután ikus mai hetan konfiansa hosi restaurante nia na’in haree osan kasir, serbisu to’o restaurante ne’e taka nia kontinua eskola nafatin.

Prinsípiu ka ideolojia moris Eufemia nian mak sosialista; ajuda ema, la’ós de’it ba família maibé mós ema seluk, kolega sira ne’ebé hadomi. Gosta ajuda karidade ba ema ruma ne’ebé mak presiza. Hadomi no halo orasaun ba ema di’ak eh lae, riku ka ki’ak no seluktan.

Bainhira nia loke atividade negósiu iha área restaurante, ho fuan, enkoraja funsionáriu sira ne’ebé mak serbisu hamutuk atu atende kliente sira ho di’ak no respeita. Nia valór individu mak tenke pasiénsia hasoru saida de’it; moris mai kedas karakter la muda tanba ema mak hakilar ka ema ko’alia barak, hanoin aat maibé nia hahalok mak nonok de’it nunka atu ko’alia hasoru.

Haree ba negósiu ne’ebé Eufemia halo ona, nia mós la sees hosi dezafiu. Dezafiu prinsipál ne’ebé mak nia hasoru durante ne’e mak bainhira ba kompra ka sosa sasán eh nesesidade restaurante nian.

“Dezafiu ne’ebé durante ha’u hasoru iha business mak uza de’it motor mak hodi ba belanja (kompra). Entaun ba tula dala rua. Maibé, sasán balun hela ne’e husu tulun ba vendedór iha merkadu sira ajuda haree, tanba ha’u mesak dalaruma mós fakar tuituir dalan fila-fali ba hili ho pasiensia. Ha’u nunka sente kolen no baruk tanba dezafiu sira ne’ebé mosu ne’e atu hadi’a di’ak liután”.

“Kalan dalaruma nia labele deskansa tanba kontrola hahán sira ne’ebé te’in no kliente sira ne’ebé mai han ne’e mós la seluk maioria kolega sira eskola, kolega media sosiál no balun família tanba ne’e presiza tuur hamutuk ko’alia halimar ho sira to’o fila,” nia haktuir.

Se mak Femia ne’e?

 Eufemia Godinho Correia, naran estimada Femia moris iha loron 10 setembru 1993 ho nia zodiáku ka fitun Virgo. Femia nia tinan  27 idade. Nia sei klosan. Nia moris iha aldeia Bebora, suku Motael, postu administrativu Vera Cruz, munisípiu Dili, hela fatin iha Bebora maibé tanba loke negósiu nia hela iha Farol. Femia nia kór favoritu mak azul no matak.

Femia nu’udar oan feto ida hosi aman Julio Saldanha Correia, moris iha Dili ho idade 54. Nia orijen hosi munisípiu Viqueque, postu administrativu Uato-lari. Femia nia inan mak Anacleta Godinho ho idade 52 moris iha Dili. Nia orijen munisipiu Liquiçá.

Eufemia Godinho Correia. Imajen/Espesiál

Tuir tradisaun avó sira nian (patriarkál), Femia dehan, oan tenke tuir apa nia kultura Uato-lari, uma-lisan naran Leticia. Nia inan hosi Liquiçá seidauk identifika loloos uma-lisan tanba avó sira mate hotu iha tinan 1975 tempu funu.

Femia nia inan-doben hanesan Dona da casa no nia aman-doben serbisu hanesan kondutór, serbisu iha projetu ka konstrusaun sívil no seluktan relevante iha empreza privada. Empreza ne’e, nia tian rasik (Teresinha da Silva) nian. Tian la iha jerasaun. Tia ajuda nia aman hodi sustenta lisuk sira (Femia ho nia maun-alin sira).

Iha uma-laran, Femia ho nia maun-alin sira hamutuk na’in lima (mane na’in tolu, feto na’in rua). Femia nu’udar oan datolu. Nia maun-alin sira mak hanesan Esyo Godinho Correia, Alice Godinho Correia, José Godinho Correia  no Euqulides Godinho Correia.

Nia maun primeiru harii ona uma-ka’in serbisu iha Sekretáriadu Komisaun Nasionál HIV/AIDS (Human Immunodeficiency Virus/Acquired Immune Deficiency Syndrom), iha Praia dos Coqueiros. Nia bin mós iha ona família rasik no hanesan Dona da casa. Enkuantu, alin mane ida dahaat (José Godinho Correia) ramata ona nia estudu, serbisu hanesan hein loja no ida ikun (Euquelides Godinho Correia) eskola hela iha  Eskola Téknika Vokasionál (ETV), Becora, Dili.

Iha tempu livre, Eufemia gosta lee livru no istória kómiku sira. Nia amante ba bola basket no futebol tanba ne’e gosta halimar modalidade desportivu rua ne’e. Femia nia animál preferidu mak asu. Tanba ne’e, nia la gosta rona ema dehan han Asu (na’an). Nia arte no pintura favoritu mak pintura tradisionál, kultura Timór nian de’it hanesan uma-lisan, kaebauk no seluk tan. Nia ema ne’ebé gosta rona múzika tanba ho múzika, tuir nia, bele sai inspirasaun no halo nia enerjétiku liután enfrente dezafiu moris.

Liga ba karakter, Femia ema ne’ebé “nervozudór” maibé domin na’in. “Ha’u ema nervozudór maibé bá família de’it ba sosiedade la iha. Ha’u-nia alin mak halo buat ruma laloos tenke hirus, morál, bá ha’u nia uma laran de’it”.

“Maski ha’u feto datoluk maibé ha’u mós hanesan responsável iha uma-laran ajuda pai-mãe, no maun alin sira hotu. Entaun, bainhira ha’u ko’alia hakarak alin sira rona ha’u, la’os egoista maibé hakarak rona malu. Ha’u-nia emosaun la dura. Bainhira hirus alin sira ha’u hanoin fó fali de’it osan. Hahalok ba kolega mak kuandu rona ema konta ha’u iha kotuk ne’e hirus duni maibé lakle’ur tanba ikus tenke buka malu di’ak lais de’it,” nia hateten.

Femia hanesan foinsa’e emprendedór ida. Tanba ne’e, nia mós iha konta ka rede sosiál rasik. Rede sosiál ne’ebé mak agora nia utiliza mak Facebook no Instagram. Nia Facebook mak Eufemia correia Lovstar no nia naran Instagram mak Eufemia Lovstar.

Kona-ba abilitasaun literária, Eufemia Godinho Correia hahú nia estudu Ensinu Primáriu Farol (2001), Pre-Sekundária São Pedro (2007) no iha tinan 2010 kontinua nia estudu sekundária iha Colegio São José. Iha 2013, nia kontinua nia estudu UNTL, iha FEST, Departamentu Informátika no ramata iha 2018.

Eufemia Godinho Correia hanoin hikas katak iha prosesu estudu nia laran problema esensiál ida ne’ebé mak nia enfrente ka hasoru lorloron iha nia vida estudante nian mak transporte tan hela iha Dili ba eskola iha Hera.

Dalaruma transporte la iha sira pasiénsia sa’e tuir de’it ema nia transporte sira ne’ebé liu Hera, tanba de’it situasaun sira ne’e dalaruma Eufemia tama aula tarde, lakle’ur nia tian Terezinha da Silva hanoin no ajuda hola motor ida ba nia uza hodi ba eskola iha Hera.

Entre dezafiu no esperansa, Femia hetan oportunidade ida hodi serbisu iha Comissão Nacional de Eleições (CNE), serbisu hanesan monitor iha fatin votasaun sira durante eleisaun prezidensiál no parlamentár nian ne’e to’o ramata.

Hahú hosi esperiénsia foun ida ne’e, “sorte” hahú haliis ba nia. Katak, Eufemia hetan tan oportunidade ida iha Timor Plaza serbisu hamutuk ho ema estranjeiru durante fulan haat no ramata.

Tuirmai, Femia “la tuur nonok” maibé esforsu buka nafatin oportunidade, tuir nia área estudu. Nune’e, iha tinan 2020 nia ba voluntáriu iha Agência Tecnologia da Informação e Comunicação (TIC TIMOR,I.P) to’o 2021 mak hafoin hetan konfiansa hodi assina kontratu servisu sai hanesan funsionáriu ba Agência TIC TIMOR,I.P.

“Ha’u agradese ba pai ho mãe tanba aman hanesan kondutór, inan hanesan Dona da casa hamutuk ho ha’u-nia tian Terezinha da Silva ne’ebé sempre akompaña ami nia estudu no presiza tomak sira sempre ajuda,” nia agradese ba família.

Nune’e, ho esperiénsia moris no estudu ne’ebé mak iha, Eufemia Godinho Correia hato’o mensajen katak: “Lalika ta’uk atu moris aat. Simu moris saida de’it. Moris ho pasiénsia ne’e di’ak liu. (Moris) tenke agradese no orasaun. Ba feto maluk sira, saida mak sente bele, hala’o de’it. Se hanoin business (negósiu) koko halo de’it; hosi ki’ik mak ba boot. keta moe iha publiku, keta moe business”.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here