Atividade teste swab ba reprezententa povu iha uma fukun Parlamentu Nasionál, Tersa, 09 marsu 2021. Imajen Tatoli/Antonio Goncalves

LIQUIÇA, 10 marsu 2021 (TATOLI) – Ekipa liña frente Ministériu Saúde,  Munisípiu Liquiça, kuarta ne’e, halo teste swab hodi foti amostra hosi abitante sira iha Suku Leorema, Postu Administrativu Bazartete, Munisipiu Liquiça.

Diretora Sentru Saúde Liquiça, Apolonia dos Santos, informa ba Agência Tatoli via mensajen WhatsApp katak ekipa liña frente MS Liquiça foti medida teste swab iha Leorema tanba simu informasaun hosi aturoidade lokal sira katak abitante sira hosi Dili lubun ida ba partisipa lia-mate iha Leorema.

Notísia Relevante : Pesoál saúde Liquiça prontu servisu kombate COVID-19

“Ami nia ekipa ba halo teste swab iha Leorema tanba simu informasaun hosi autoridade lokál no Administradór Postu Administrativu Bazartete katak sidadaun balu mai hosi area afetadu hanesan Dili mai halo lia iha Leorema,” Apolonia hateten.

Nia dehan, ohin ekipa konsege halo teste swab ba de’it komunidade na’in-haat tanba jeografikamente komunidade sira hela dook malu. Mezmu nune’e, ekipa liña frente Liquiça nafatin mantein pozisaun hodi hamriik iha oin atu próteze komunidade sira hosi peste letál COVID-19.

Definisaun teste swab

Teste swab ne’e halo atu foti amostra (sampel) cairan hosi inus-laran ka kakorok-laran.  pesoál saúde sei hatama ferramenta espésie atu hanesan cotton bud ho medida boot-uitoan ba kakorok-laran no inus-laran. ho nune’e, amostra Swab ne’e hatama ba fatin espesífiku (tabung khusus) no taka halo metin didi’ak ho kuidadu tebes.

Amostra ne’ebé foti hosi teste swab ne’e haruka ba laboratóriu nasionál atu halo analiza liuhosi téknika PCR.

PCR maka tékniku analiza ne’ebé halo kombinasaun DNA ka RNA ne’ebé hetan virus. DNA ka RNA ne’ebé iha amostra teste swab ne’e sei halo replikasaun ka halo barak depois kombina fali ho estrutura DNA SARS-COV2 nu’udar template.  Se iha indikasaun amostra pasiente ida nian hanesan ka han-malu (cocok) ho estrutura DNA SARS-CO2, maka pasiente ne’e kategoria iha sintoma ka pozitivu COVID-19.  Se la cocok, maka pasiente negativa.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here