Ekipa saneamentu rekolla hela lixu iha Kapitál Dili. Imajen Tatoli/Antonio Gonçalves.

DILI, 10 marsu 2021 (TATOLI)—Vise-Ministru Administrasaun Estatál (MAE), Lino de Jesus Torrezão, hateten pesoál saneamentu iha Munisípiu Dili kontinua ativamente hamoos no rekolla lixu iha sidade laran bazea ba despaixu ministeriál Nú. 17/M-MAE/III/2021.

Notísia Relevante: Serka Sanitária: La’os de’it ema, lixu mós labele sai hosi Dili

Despaixu ministeriál ne’e hateten, fahe ekipa saneamentu ba grupu rua mak grupu ida servisu iha dadeersa no grupu seluk servisu iha tempu lorokraik nian, nune’e ekipa hamoos no kontinua rekolla lixu antes tama iha meiudia almosu nian, hodi bele garante no mantein sidade moos no desinfetadu.

Tuir nia, despaixu ministerial ne’e mór haktuir Diretór Jerál, responsável másimu kada servisu sentral Ministériu Administrasaun Estatál (MAE) nian no Prezidente Autoridade Munisípiu Dili define halo servisu esénsiál sira hanesan pesoál limpeza esgotu, limpeza iha dalan públiku, no transporte rekolla lixu iha sidade laran, inklui ekipa saneamentu ne’ebé halo operasaun rekolla lixu ba Sidade Dili nia laran.

“Servisu ekipa saneamentu iha kapitál Dili kontinua la’o tanba lixu loro-loron aumenta, nune’e ita labele husik lixu nakonu Dili laran. Tanba ne’e, ita bazea ba despaixu ministeriál atu autoriza ekipa saneamentu kontinua hamoos no rekolla lixu,” Lino de Jesus Torrezão hatete ba Agência TATOLI loiuhosi telefónika, kuarta ne’e.

Tuir Vise-Ministru, ekipa saneamentu ne’e servisu tuir turnu de’it la’ós ekipa tomak tún halo limpeza, la’e.

“Se ida-ne’e mak ita la antesipa tanba antes reativa lockdown ne’e, lixu nakonu tiha Sidade Dili tanba ne’e mak ekipa ne’e kontinua servisu hodi sidade moos no saudável,”  Vise-Ministru ne’e hateten.

Kona-ba impedementu seguransa Munsípiu Liquiça ba kamioneta tula lixu, Vise-Ministru ne’e hateten ida-ne’e MAE sei aprosima ho sira atu ko’alia nune’e kamioneta ne’e bele lori lixu ba fakar iha Liexeira Tibar.

“Ida-ne’e, ami sei ko’alia ho Jestaun Krize tanba se lae foer nakonu Dili laran. Aleinde ne’e, ha’u sei kontaktu ba parte Munisípiu Liquiça atu toma atensaun mós ba kestaun ne’e,” membru Governu ne’e klarifika.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here