DILI, 10 marsu 2021 (TATOLI)–Autoridade Aduaneira (AA)/Alfándega aplika sansaun administrativa ba kompañia Perisos, ne’ebé hatama foos tonelada 6.800 maibé laiha segel, iha Portu Dili, tersa (09/03).
Diretór Operasaun Alfándega, Julião Ximenes, haktuir, bainhira ró tama, Alfándega pasa revista foos maibé haree laiha segel, tanba ne’e bolu kapitaun ró no parte ajensia responsavél ba deskaregamentu foos atu esplika.
“Horseik ami la halo apreensaun, maibé halo de’it prosesu ba ajénsia no kapitaun ró ne’ebé lori foos mai no sira kumpre ona lori karta mai iha Alfándega hodi fó prosesu, ne’ebé selu koima, horiseik loraik prosesu hotu ona no Alfándega autoriza halo deskaregamentu,” Diretór Operasaun Alfándega informa ba Agência TATOLI, via telefónika kuarta ne’e.
Tuir Julião Ximenes, foos deskarega ona no tula ona ba kompañia sira-nia armazen.
“Laiha problema, tanba kapitaun ró no ajensia responsabiliza no fó justifikasaun tanba saida maka segel ne’e laiha,” nia akresenta.
Jornalista: Natalino Costa
Editora: Julia Chatarina
