Ofisiál PAX, dezinfekta edifísiu Parlamentu Nasionál, tersa (9/03). Imajen Tatoli/Antonio Gonçalves.

DILI, 09 marsu 2021 (TATOLI)—Sala Situação Centro Integrado Gestão de Crises (SS-CIGC), liuhosi Vise-Koordenadora Forsa-Tarefa ba Prevensaun no Mitigasaun, Odete da Silva Viegas, husu família-sira atu lori sira-nia oan ne’ebé hala’o estudu iha eskola CAFE Taibesi, Edukasaun Pré Eskolár Canosa Has Laran no International School Maharlika Fatuhada, ba halo swab.

Odete da Silva Viegas husu ne’e tanba kazu pozitvu tolu kompostu hosi profisionál saúde ho nia-oan na’in-rua ne’ebé ekipa konjunta saúde deteta liu hosi rastreiu iha fatin risku iha Ospitál Nasionál Guido Valadares, labarik ida eskola iha eskola CAFE Taibesi no ida seluk iha International School Maharlika Fatuhada.

Notísia Relevante:COVID-19: pozitivu 13, baixa aumenta ba 48

Alende ne’e, kazu foun ida ne’ebé deteta iha bairru BTN II, Tasi Tolu, Suku Madohi, Postu Administrativu Dom Aleixo, ninia-oan eskola iha Edukasaun Pré Eskolár Canosa Has Laran.

“Lori lalais ita boot sira-nia oan mai halo swab iha fasilidade saúde ne’ebé besik tanba virus ne’e da’et lalais,’’ Odete da Silva Viegas apela liu hosi konferénsia imprensa iha Centro Convenções Dili, tersa ne’e.

SS-CIGC mós fasilita númeru 119 ne’ebé família-sira bele halo kontaktu direta bainhira hakarak hetan swab ho lalais.

Odete fó hanoin katak, bainhira labarik-sira ne’e hetan ona swab, SS-CIGC sei haruka ba idaidak-nia uma hodi hein rezultadu teste.

Durante periúdu hein rezultadu teste iha uma, SS-CIGC husu tenke kumpri medida prevensaun-sira ne’ebé iha.

Parte SS-CIGC mós fó nafatin esperansa katak, ba saúde públika hotu-hotu tenke kontribui no labele pániku.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here