Diretór Ezekutivu SERVE, Florêncio Sanches. Imajen TATOLI/António Gonçalves

DILI, 09 marsu 2021 (TATOLI)—Servisu Rejistu no Verifikasaun Emprezariál (SERVE) sei aplika multa ba negosiante online ne’ebé halo atividade negósiu maibé la rejistu atividade.

“Negósiu online ne’ebé maka la rejistu iha SERVE ne’e tuir lei sei selu multa to’o $5.000,” Diretór Ezekutivu SERVE, Florêncio Sanches, informa ba Agência TATOLI, via telefónika, tersa ne’e.

Tuir responsável, rejistu ne’e importante tanba bainhira hanesan negósiu online ai-moruk ida rejistu atividade iha SERVE, sei halo koordenasaun ho parte kompetente hanesan Ministériu Saúde (MS) no Ministériu Turizmu, Komérsiu no Indústria (MTKI), ho nune’e sei iha ekipa tun ba terrenu atu haree didi’ak fatin.

“Kuandu ita haree maka la  tama rekezitu, SERVE no ministériu sei la autoriza maibé bainhira prenxe rezitu maka sei permite atu halo atividade negósiu,” nia akresenta.

Diretór Ezekutivu ne’e konsidera, negósiu ai-moruk no restaurante iha risku a’as, tanba ne’e presiza iha koordenasaun ho parte kompetente.

Daudaun iha negósiu online ne’ebé mak rejista ona iha SERVE hamutuk 170.

“Ami enkoraja ba sira ne’ebé maka agora halo hela negósiu online maibé seidauk rejistu iha SERVE, bele ba rejistu tanba ita lakohi hanesan sira ne’ebé la rejistu ema ba kaer, tanba moris ohin loron ne’e susar, ema ba kaer imi depois ba multa tan $5.000,” nia hatutan.

SERVE iha ona sukursál sia iha munisípiu, ne’ebé negosiante sira bele ba rejista atividade ho rekezitu simples.

“Ami hahú simplifika rekezitu ba rejista atividade negósiu hodi fó oportunidade ba ema hotu halo negósiu,” nia tenik.

Jornalista: Natalino Costa

Editora: Julia Chatarina

PUBLISIDADEiklan

1 KOMENTÁRIU

  1. Sua Exmo. Sr. Florencio Sanches,
    Director Ezecutivu SERVE

    Obrigado barak sr. Director nia laran luak bele ajuda ema hotu liu-liu Timor oan sira bele hetan opportunidade hodi halo negosio fo moris lor-loron nian. Hau ata mos hakarak atu halo negosio ki’ik oan ruma maibe hau ata seidauk hatene oinsa bele registu iha SERVE? Bele ka hau ata bele hetan email SERVE nian ho nune’e hau ata bele komunika officals sira. Hau ata hakarak atu hasoru Sr. Director Ezecutivu SERVE.

HAKEREK NO HATÁN

Please enter your comment!
Please enter your name here