Imajen/SAS Timor-Leste.

DILI, 09 marsu 2021 (TATOLI)—Xefe Departamentu Abastesementu Água Munisípiu Dili, Francisco Perreira Xavier, hateten durante serka sanitária iha Munisípiu Dili, ekipa operadór bee-moos kontinua oferese bee-moos ba komunidade iha Dili laran.

Nia dehan, maske Estadu deside ona halo serka sanitária ba Munisípiu Dili durande semana ida maibé iha ne’ebá sei haree mós ba servisu balu labele hosik liuliu hanesan abastamentu bee-moos ba komunidade iha Sidade Dili.

 “Maske iha situasaun serka sanitaria nia laran, ha’u aviza ba ekipa operadór bee-moos sira kontinua nafatin fornese bee-moos ba komunidade iha Kapitál Dili tanba nesesidade bee-moos importante tebes ba ema-nia moris,” Xefe Departamentu Abastesementu Água Munisípiu Dili, Francisco Perreira Xavier, ba Agência TATOLI liuhosi telefónika, tersa ne’e.

Nia dehan, operadór sira kontinua servisu hanesan loke bee-moos ba komunidade tanba operadór sira hela de’it iha estasaun bee-mos nian.

“Importante mak nafatin aplika protokolu Organizasaun Mundiál Saúde (OMS) nian ne’ebé fó sai ona iha Ministériu Saúde hanesan uza máskara, fase liman ho sabaun ka hand sanitizer no distansiamentu sosiál,” nia dehan.

Nia haktuir, durante iha serka sanitária mak komunidade iha Sidade Dili balun mak asesu ba bee-moos menus ka bee la sai tenke pasa informasaun, nune’e parte operadór sira bele haree tanba agora tempu udan dala ruma iha bee-ulun kanu ne’ebé bee halai tuir intupidu tiha.

“Dalaruma kanu iha bee-ulun intupidu, entaun dala ruma ita haree débitu ka presaun bee-moos nian iha bairru balun menus. Maibé, buat sira-ne’e akontese komunidade presiza informa lalais mai ami, nune’e posibilidade ami bele ajuda lalais liuliu liga ba operadór sira. Tanba daudaun ne’e iha Munisípiu Dili monta hotu ona kanu bee-moos nian ba komunidade hotu,” nia dehan.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here