Sekretáriu Estadu Kooperativa, Elizário Ferreira. Imajen TATOLI/António Gonçalves

DILI, 09 marsu 2021 (TATOLI)–Sekretáriu Estadu Kooperativa (SEkoop), Elizário Ferreira, hasai sirkulár ida hodi limita funsionáriu serbisu iha eskritóriu durante aplikasaun serka sanitária iha kapitál Dili, hahú loron 09 to’o 15 marsu.

“Liga ho serka sanitária, funsionáriu sira ne’ebé menus tarefa serbisu, husu atu deskansa de’it iha uma maibé bele tama serbisu bainhira seidauk hetan kontaktu hosi superiór sira,” refere sirkulár ne’ebé Agência TATOLI asesu hosi Gabinete SEkoop, tersa ne’e.

Sita mós katak, ba kargu xefia iha diresaun nasionál no xefe departementu sira, husu atu serbisu nafatin no kada departementu no diresaun ida bele akomoda ema na’in-lima de’it.

“Ba Gabinete Sekretaria Estadu Kooperativa, bele tama nafatin hanesan bain-bain maibé tuir nafatin protokolu saúde,” subliña sirkulár SEKoop.

Enkuantu, kompañia sira ne’ebé oras ne’e halo hela distribuisaun Cesta Bázika iha munisípiu sira, bele halo distribuisaun nafatin, maibé bainhira ramata ona, husu atu hein desizaun Governu.

Nune’e mós, ba formasaun ne’ebé halo iha munisípiu sira bele kontinua halo nafatin, maibé bainhira ramata ona husu atu hein desizaun Governu.

Jornalista: Natalino Costa  

Editora: Julia Chatarina

HAKEREK NO HATÁN

Please enter your comment!
Please enter your name here