Membru PNTL hala'o hela serka sanitaria iha Tasi-Tolu hodi halo mós auto stop ba transporte publiku, privadu no ema lao ain ne'ebe tama-sai Dili, Tersa, 09 marsu 2021. Imajen Tatoli/Antonio Goncalves

DILI, 09 marsu 2021 (TATOLI)-Komandu Polísia Nasionál Timor-Leste (PNTL) Munisípiu Dili, tersa ne’e, hahú hosi oras 00:00 Otl, blokeia ona pontu entrada Kapitál Dili.

Pontu entrada ne’ebé blokeia mak hanesan hosi parte Metinaro, Palásiu Nobre-Lahane, Manleuana, Beduku, Tibar no Tasi-Tolu hodi kumpre serka sanitária ba prevensaun propagasaun COVID-19.

Notísia Relevante : Serka sanitária: movimentu ema ho transporte hahú menus iha Dili

Membru PNTL hala’o serka sanitaria iha Tasi-Tolu, Dili, tersa 09 marsu 2021.Imajen Tatoli/Antonio Goncalves

Tuir observasaun Agência Tatoli, iha   area Tasi Tolu, Dili, nota katak iha membru Polísia Batallaun Orden Públika (BOP) ho unidade Task Force   na’in-12 maka destaka  fó seguransa iha area pontu entrada Tasi Tolu nian.

Polísia  mós  tau sinais tránzitu ka  auto stop hodi blokeia taka metin iha estrada laran.

Notísia Relevante : Kazu pozitivu foun neen hosi Tasi-tolu, ida hosi Bebonuk

Membru autoridade seguransa ne’ebé destaka fo seguransa iha pontu esntrada Dili nian iha Tasi-tolu, informa durante serka sanitária hodi la autoriza ba sidadaun rezidente ne’ebé daudaun iha Dili  atu sai hosi Dili ba munisípiu seluk.

Tuir observasaun  Agência Tatoli nian mós nota katak iha abitante balun ne’ebé hela iha Tibar, Liquiça hosi Dili ba Tibar  membru seguransa sira la autoriza atu liu. Maibé ninia mekanizmu ba sidadaun rezidente iha Dili ne’ebé daudaun iha  hosi munisípiu mai  Dili autoriza bele tama hafoin to’o iha Dili sei la autoriza atu  sai hosi fila-fali ba munisípiu no halo mós  rejistu naran ne’ebé hatudu  ho kartaun eleitorál.

Movimentu iha Dili laran komesa menus, la hanesan ona loron sira liubá. Mezmu nune’e, autoridade seguransa fó espasu atu abitante sira bele halo movimentu ba  kompras nesesidade, sosa ai-moruk, pulsa eletrisidade no seluk tan ne’ebé kategoria nesesidade importante liu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here