Ativista feto-foinsa’e, Ma Kyal Sin, ne’ebé militár Burma oho hamutuk ho ema na’in-38 iha demonstrasaun boot ne’ebé organiza hosi ativista pro-demokrasia hamutuk ho povu Myanmar hodi kontra golpe Estadu ne’ebé halo hosi rejime militár Myanmar, iha loron 3 fulan-marsu tinan 2021. Imajen/Espesiál.

DILI, 09 marsu 2021 (TATOLI)—Partidu Demokrátiku (PD) lideradu Mariano Assanami Sabino fó solidariedade ba povu no ativista pro-demokrasia iha Burma ne’ebé loron ba loron hasoru situasaun defísil tebes.

Prezidente Partidu Demokrátiku (PD), Mariano Assanami Sabino, hateten haree ba situasaun polítika iha nasaun Burma ka Myanmar ne’ebé hosi loron ba loron aumenta manas ba beibeik ho demonstrasaun boot ne’ebé organiza hosi ativista pro-demokrasia hamutuk ho povu Myanmar hodi kontra golpe Estadu ne’ebé halo hosi rejime militár Myanmar.

Iha deklarasaun Organizasaun Nasaun Unida (ONU) nian ba demonstrasaun boot iha loron 3 fulan-marsu tinan 2021, ne’ebe hamate ema na’in-38 inklui ativista feto-klosan ida ho naran Ma Kyal Sin tanba hetan tiru hosi militár Burma.

Imajen/Espesiál.

“Ho ida-ne’e, Partidu Demokrátiku fó solidariedade ba Povu no ativista pro-demokrasia iha Myanmar ne’ebé fó ona sira-nia aan tomak hodi defende nafatin demokrasia,” Prezidente PD Mariano Assanami Sabino no Vise-Sekretáriu Jerál no Portavós PD, Nino Pereira, informa liuhosi komunikadu imprensa ne’ebé Agência TATOLI, asesu tersa ne’e.

Partidu Demokrátiku kondena maka’as ba aktu brutalizmu, violenta no la respeita direitu umanu ne’ebé halo hosi rejime militár Myanmar nian.

PD husu ba militár Myanmar atu hapara imediatamente asaun tiru ema sívil sira no fó fila-fali konfiansa povu nian ba Partidu Liga Nasionál Demokrátiku ne’ebe lidera hosi Laureada Prémiu Nobel da Páz, Aung San Suu Kyi.

Partidu Demokrátiku husu ba ONU no nasaun boot sira seluk ne’ebé durante ne’e sai nu’udar defensór ba demokrasia atu tau-matan ba povu Myanmar ne’ebé luta hela defende demokrasia hodi lori fila-fali pás iha nasaun refere.

Myanmar (uluk bolu Birmánia) nu’udar nasaun ida iha Sudeste Aziátiku no iha grupu étniku liu 100, Myanmar baliza ho Índia, Repúblika Populár Xina, Laos no Tailándia.

Yangon, nu’udar sidade boot liu iha nasaun refere. Sidade Yangon ne’e mós kompleta ho relíkia Budista hahú hosi sékulu VI. Banku Mundiál fó-sai iha 2018 katak totál populasaun hamutuk millaun 53,71 no nasaun ne’e ho luan 676.578 km² no Myanmar sai membru ASEAN iha 1997.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here