DILI, 09 marsu 2021 (TATOLI)--Insititu Jestaun Ekipamentu, Institutu Públiku (IGE, I.P, sigla portugés) halo ona pedidu autorizasaun ba Ministériu Obra Públika (MOP) atu submete ba Ministériu Interiór (MI) no Sala Situasaun, Sentru Integradu Jestaun Krize (CIGC, sigla portugés) atu lori hahán ba ekipa iha munisípiu Bobonaro, Baucau, Covalima no Manatuto.
Prezidente Konsellu Administrasaun IGE, Ermenegilda da Costa Laurentina, hato’o ona karta pedidu ba Ministru Obra Públika, Salvador Eugênio Soares dos Reis Pires.
“Kuandu ami hetan ona karta autorizasaun, ekipa IGE deskola kedan ba munisípiu haat hodi lori hahán no mina ba ekipa destakadu iha terrenu,” Prezidente IGE informa ba Agência TATOLI, via telefónika, tersa ne’e.
Konsellu Ministru aprova rezolusaun Governu númeru 12/2021, 08 marsu ne’ebé impoin serka sanitária no konfinamentu obrigatóriu iha munisípiu Dili durante loron hitu no entra em vigór hahú oras 00:00 loron 09 to’o oras 23:35 loron 15 marsu 2021.
Serka sanitária ne’e, hodi fó biban ba ekipa saúde ho akompañamentu autoridade seguransa halo vijilánsia saúde, buka kontaktu besik infetadu COVID-19 no teste swab iha kapitál Dili.
“Ami mantein nafatin ho serbisu tuir kondisaun serka sanitária iha kapitál Dili no enkuantu iha situasaun urjente, ekipa IGE prontu apoia servisu,” nia akresenta.
IGE hanesan instituisaun ida atu garante utullizasaun efisiente ba mákina pezada, ekipamentu no veíkulu pezadu.
Iha tinan 2005, Governu deside kria IGE hanesan institutu públika ho autonomia administrativa, finaseira ho patrimóniu própriu ne’ebé responsável ba boa jestaun no esplorasaun ba bens iha ámbitu prosekuasaun dezenvolvimentu infraestrutura no nesesidade ba serbisu administrasaun públika.
Jornalista: Florêncio Miranda Ximenes
Editora: Julia Chatarina