Edifísiu Institutu Politékniku Betano. Imajen/Espesiál

DILI, 09 marsu 2021 (TATOLI)—Estudante admitidu na’in 167 la konsege halo inskrisaun iha Institutu Politékniku Betano (IPB), hodi kompleta vaga 300 iha tinan ne’e.

“Ita hetan de’it estudante 133 ne’ebé halo ona sira-ninia inskrisaun. Signifika, 167 lakon sira-nia paradeiru,” Prezidente IPB, Acacio Amaral  hateten ba jornalista Agência Tatoli via telefónika, tersa ne’e.

Notísia Relevante:Estudante 5.582 admitidu ba UNTL no IPB

Hosi estudante na’in 133 ne’ebé halo ona inskrisaun, IPB koloka tuir kursu ne’ebé sira desidi ona mak hanesan kursu Produsaun Animál totál 69 kompostu hosi feto na’in 36 no mane na’in 33. Kursu Konstrusaun Sivíl na’in 64, feto na’in 18 mane na’in 46 ne’ebé sira-nia kursu ho nível akadémiku baxarelatu.

Prezidente IPB ne’e mós la hatene razaun loloos hosi estudante na’in 167 ne’ebé lakon oportunidade hodi la konsege rejistu iha Betano.

“Dalaruma sente la serve atu eskola iha IPB. Sira ne’e dalaruma mai hotu hosi rai bo’ot-sira. Tanba ne’e mak sira lakohi tama iha IPB, bele mós hanoin katak eskola ne’e laiha kualidade no izoladu,” nia hateten.

Entretantu, estudante na’in 133 ne’ebé rejistadu, ohin hahú partisipa iha aula prezensiál iha Institutu Politékniku Betano, Munsípiu Manufahi.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here