Traballadór EDTL halo instalasaun fiu eletrisidade iha área Comoro, kinta (04/03). Imajen TATOLI/António Gonçalves

DILI, 09 marsu 2021 (TATOLI)–Eletricidade de Timor Leste, Empreza Públika (EDTL, E.P) planeia atu halo manutesaun ba sistema venda prepagu ka Upgrade Server Primary (USP), hahú tuku 22:00 kalan to’o 05:00 madrugada, loron 12 to’o 14 marsu.

“Ita-nia tékniku sira sei halo manutesaun sistema durante loron rua, maibé iha tempu kalan de’it tanba rai loron konsumidór sira bele ba hola pulsa eletrisidade ho normál,” Prezidente EDTL, Paulo da Silva, informa ba Agência TATOLI, via telefónika, tersa ne’e.

Tuir Prezidente empreza estatál ne’e, durante halo manutensaun sistema sei laiha transasaun hosi sistema venda.

“EDTL husu atu konsumidór eletrisidade bele hola pulsa eletrisidade antes. Ita hatene katak oras ne’ebé ita determina maioria konsumidór la hola pulsa tanba kalan ona,” nia akresenta.

Hafoin manutensaun sistema prepagu eletrisidade, sei kontinua nafatin simu transasaun iha estabelesimentu EDTL ho normál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here