Traballadór EDTL halo instalasaun fiu eletrisidade iha área Comoro, kinta (04/03). Imajen TATOLI/António Gonçalves

DILI, 09 marsu 2021 (TATOLI)—Prezidente Eletricidade de Timor-Leste, Empreza Públika (EDTL, E.P), Paulo da Silva, hateten ekipa tékniku sei kontinua presta serbisu iha períodu serka sanitária atu garante  ahi-lakan normál iha territóriu tomak.

“Iha karta despaisu hosi Ministru Obra Públika, Salvador Eugênio Soares dos Reis Pires, define ona serbisu esensiál sira,ne’ebé inklui EDTL, tanba se la tama mak ahi mate ita problema barak liután,” Prezidente EDTL informa ba Agência Tatoli, via telefónika, tersa ne’e.

Antes ne’e, Konsellu Ministru aprova rezolusaun Governu atu impoin serka sanitária no konfinamentu obrigatóriu iha munisípiu Dili durante loron hitu, hahú hosi loron 09 to’o 15 marsu.

Nune’e, Prezidente EDTL garante ekipa tékniku nafatin regra hosi Ministériu Saúde (MS) no Organizasaun Mundiál Saúde (OMS, sigla portugés) atu prevene-an.

Biban ne’e, EDTL husu ba konsumidór atu kumpre regra serka sanitária bainhira ba hola pulsa eletrisidade sira iha sentru estabelesimentu.

“Daudaun ne’e, komunidade presiza kumpre nafatin regra sira hodi evita kontájiu COVID-19 iha munsípiu Dili no Timor-Leste tomak,” nia akresenta.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here