Ekipa Vijilánsia Ministériu Saúde Nasionál no Saúde Munisipál Covalima hala’o ona teste Escreening Masál ka Teste Swab ba abitante sira iha Aldeia Makokon, Suku Nanu, Postu Fatumea, Munisípiu Covalima. Imajen TATOLI/Eugénio Pereira.

DILI, 09 marsu 2021 (TATOLI)–Sala Situasaun Sentru Integradu Jestaun Krize (CIGC, sigla portugés) planeia atu amenta tan pesoál saúde hodi reforsa ekipa konjunta saúde munisípiu Dili hodi tun ba fatin sira identifikadu halo teste swab.

Tuir Vise-Koordenadora Forsa-Tarefa ba Prevensaun no Metigasaun Surtu COVID-19, Odete da Silva Viegas, sei fahe mós tarefa serbisu, tanba bainhira halo teste swab hotu, tenke evakua kedas amostra ba Laboratóriu Nasionál (LABNAS), nune’e bele hatene lalais ninia rezultadu.

“Durante ne’e ekipa konjunta saúde iha terrenu sei menus. Rekursu halo teste, ami pleneia atu amenta tanba atu identifika ema ne’ebé kontaktu direta ho pozitivu iha fatin 10, signifika grupu 10 mak tenke koloka ba fatin sira ne’e,” Vise-Koordenadora relata liuhosi konferénsia imprensa iha Sentru Konvensaun Dili (CCD, sigla portugés), tersa ne’e.

Atuál Diretora Jerál Prestasaun Saúde-Ministériu Saúde (MS) ne’e informa, iha semana hirak ne’e bele aumenta tan rekursu.

Ekipa vijilánsia hamutuk na’in-30, fahe ba grupu neen maibé presiza amenta tan atu nune’e bele kobre iha fatin hotu.

“Agora ami halo jestaun ba rekursu no lojístika, nune’e hafoin sira tun ba terrenu hodi foti swab, tenke hodi kedas amostra sira ba laboratóriu atu nune’e labele hein tempu naruk liu,” nia hatutan.

Aleinde ne’e, CIGC hakarak prepara mós ekipamentu saúde hodi reforsa serbisu iha terrenu.

“Ami buka organiza-an inklui mós reajente, tanba ita-nia reajente sufisiente maibé tenke halo ona preparasaun se karik mosu kazu barak liu presiza halo screening masál. Ita (Timor-Leste) preparadu iha kondisaun saida de’it, bainhira ema moras moderadu to’o tama kondisaun grave. Ekipa Ministériu Saúde hamutuk ho Sentru Integradu Jestaun Krize deskute hela asuntu sira ne’e,” Odete akresenta.

Sorin seluk, CIGC mós planeia fahe tarefa serbisu bainhira kazu ativu akontese ho númeru boot.

“Entaun ami tenke organiza-an atu ekipa sira serbisu ho di’ak, sera que ami serbisu mesak ka presiza integra tan ema iha grupu,” nia hatutan

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here