Produtu Cesta Bázika iha bote Imajen TATOLI/Antónia Gusmão

DILI, 08 marsu 2021 (TATOLI)—Xefe Suku Soba, Postu Administrativu Laga, Munisípiu Baucau, Francisca Mónica de Fátima Soares, informa komunidade iha aldeia rua hanesan Aldeia Heu-uai no Butufalo ho xefe família hamutuk 1.440 mak to’o agora seidauk simu Cesta Bázika tanba sasán sira seluk ramata ona eseptu foos.

“Ita-nia komunidade xefe família 1.440 mak seidauk simu cesta bázika tanba sasán hotu. Maibé, kona-ba foos ami sei iha saku 480 hodi augenta fahe. Parese iha tempu badak ka loron tolu ka haat, ami kontinua fali distribui Cesta Bázika ba ita-nia komunidade sira-ne’e,” Francisca Mónica de Fátima Soares informa ba Agência TATOLI liuhosi telefónika, segunda ne’e.

Nia hatutan, foos hamutuk saku 480 ne’e restu hosi aldeia haat nian, nune’e sei falta foos saku 950 mak sei iha Munisípiu, nune’e husu ba Centro Nacional Logística (CLN) para tau hamutuk iha armajen agrikultór nian iha Postu Administrativu Laga.

“Tanba aldeia rua iha Laga Vila dook liu, la’o kilometru sia (9) mak foin to’o iha ami-nia sede suku. Tanba ne’e, husu ba CLN lori sasán Cesta Bázika nian karik, di’ak liu tau iha ami-nia armajen uluk Ministériu Agrikultór halo hela iha Postu Administrativu Laga nian,” nia hateten.

Autoridade komunitária ne’e hateten, aldeia haat (4) seluk ne’ebé simu ona cseta bázika mak Assa-Nuno, Boleha, Fatiliri, no Aldeia Laicua ho totál komunidade hamutuk 1.771.

“Distribuisaun Cesta Bázika ba iha Suku Soba ne’e, CLN mak distribui direta no hetan apoiu transporte hodi tula sasán mak hosi Empreza Mutiara ho ninia item sira hamutuk 18,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here