Superintendente Júlia da Gama, konversa ho Lider Karizmátiku Kay Rala Xanana Gusmão iha Manatuto. Imajen Tatoli/Eugénio Pereira

DILI, 08 marsu 2021 (TATOLI)- Iha istória Instituisaun Polísia Nasional Timor-Leste (PNTL) nian, maioria maluk mane de’it maka asume postu másimu hanesan Komisáriu.

Hahú kedas hosi Komandante Jerál PNTL, Superintendente Paulo de Fatima Martins, mai to’o Inspektór Mateus de Jesus (komandante jerál interinu) no Komisáriu Longuinhos Monteiro, Komisáriu Julio da Costa Hornay to’o mai atuál Komisáriu Faustino da Costa.

Notísia Relevante : Komandu PNTL kontinua aposta formasaun ba polísia feminina

Sira-hirak ne’e mesak mane hotu de’it. Tanba ne’e,    Superintendente Julia da Gama nia espetativa, atu tempu ruma iha futuru bele hetan Polísia feminina ida okupa postu Komisária hodi sai Komandante Jerál ba Instituisaun ne’ebé servisu ba povu ho Estadu ho lema “Mantén Lei ho Orden”.

Komandante Departamentu Jéneru PNTL, Superintendente Julia da Gama, halo entrevista ho jornalista sira. Imajen Tatoli/Eugénio Pereira

Xefe Gabinete Departamentu Jéneru iha Komandu Polísia Nasionál Timor-Leste (PNTL), Superintendente, Julia da Gama, hateten partisipasaun feto iha  dezenvolvimentu nasaun importante tebes. tanba ne’e,  presiza tebes meiu adekuadu no sistemátika hodi kapasita feto-maluk sira sai lider ne’ebé kapabel iha uma-laran, iha sosiedade no iha nasaun.

Iha komemorasaun Loron Mundial Feto ba tinan-ne’e, 08 marsu, Superintendente Julia da Gama, lori instituisaun PNTL liuhosi Gabinete Jéneru  hato’o parabens ba feto maluk iha Timor-Leste no mundu, liu-liu ba maluk polísia feminina sira hotu.

Nu’udar feto ne’ebé hetan fiar hosi instituisaun PNTL, Julia da Gama, sente  inspira  nia haree katak feto hanesan parseiru importante ba mane-maluk sira iha uma-kain, sosiedade no nasaun. Tanba ne’e, presiza tebes atu fó espasu hanesan ba feto atu bele dezenvolve aan no tuur hanesan ho mane-maluk sira iha aspetu hotu.

“Hanesan pesoál kontribui ba nasaun liuhosi kna’ar ne’ebé iha hodi kumpre ba regra sira no fó onra ba superior no lakohi viola orden sira atu bele fó konfiansa hodi serve nafatin instituisaun,” Superintendente, Julia Gama hateten ba Agência Tatoli iha nia servisu fatin, Kuartél Jerál PNTL, Caicoli, Dili, segunda ne’e.

Julia da Gama hetan nomeasaun asume kna’ar nu’udar Xefe Gabinete Departamentu Jéneru iha PNTL iha jullu 2020. Hosi ne’ebá   nia koko atu komprende hodi hakbiit an iha ámbitu servisu ho ekipa.

Xefe Gabinete Departamentu Jéneru PNTL, Superintendente Julia da Gama. Imajen Tatoli/Antonio Goncalves

“Ita tenke iha vizaun hodi sai inspiradór ba ita-nia feto-maluk.  Bainhira hakarak sai inspiradór tenke sai matadalan ne’ebé buka dalan hotu hodi bele atinje buat ne’ebé mak iha,’’ Julia da Gama hateten.

Istória PNTL

Polisia Nasional Timor Leste (PNTL) harii iha tinan 2000 ho metamorfoze sira PNTL nian maka hanesan iha tinan 2000 to’o 2001 Instituisaun Estadu ida-ne’e hanaran Timor Leste Police Services (TLPS) nune’e hahú 2001 to’o 2002 naran TLPS nakfilak ba East Timor Police Services  (ETPS).

Liuhosi revista PNTL nian www.pntl.tl kona-ba Istória PNTL mensiona katak iha momentu Instituisaun ne’e iha faze ida ba Konsolida no buka naran própriu no merese ba Nasaun ida-ne’e, maioria iha ema barak inklui joven balun mosu persesaun ida hodi haneon katak pesoál sira ne’ebé hala’o knar iha tempu 2000-2002 so servisu hodi apoiu no ajuda Pesoál ONU nian ne’ebé maka hala’o hela knar ba Paz, Estabilidade no mantein seguransa iha rai-laran ne’ebé loron ruma depois mandatu ONU nian iha Timor-Leste, Instituisaun ida-ne’e mós la eziste tan no Governu Timor-Leste sei estabelese hikas fali Instituisaun Seguransa ida iha Rai-Laran.

Maske nune’e iha  2002 to’o ohin Governu Timor-Leste liuhosi Lideransa Ministru Interior tempu ne’ebá, Rogério Tiago Fatima Lobato, transforma Instituisaun ne’e hodi hanaran Policia Nacional de Timor Leste (PNTL) ne’ebé nafatin moris no lao to’o ohin loron.

Iha ona progresu barak maka akontese iha PNTL maske sei nafatin enfrenta sasadik sira (dezafiu) balun maka durante prosesu dezenvolvimentu Instituisaun PNTL, nune’e sasadik  balun ne’ebé PNTL enfrenta maka Servisu sistema administrativu inklui servisu sira iha area operasionál PNTL nian.

Hahú hosi tempu UNTAET to’o UNMISET, PNTL  uza Regulamentu UNTAET No.: 22/2001 ne’ebé mai ho estrutura diviza lima (Agente Recruta/RA, AGENTE, SENIOR AGENTE, SUB INSPECTOR no INSPECTOR kona-ba Diviza rua seluk maka SUPERINTENDENTE no COMISSARIO so aplika ka fá ba Lideransa ne’ebé maka Lidera PNTL, hanesan iha tempu ne’ebá Paulo de Fatima Martins, nomeadu ba Diretór Nasionál ne’ebé ikus mai hanaran fali Komandante Jerál  PNTL ho Diviza Superintendente ne’ebé remata nia mandatu iha tinan 2006.

Depois mandatu Paulo de Fatima Martins nian, Governu Timor-Leste liuhosi Ministru Interiór, Alcino Barris de Araujo, nomeia Inspektor Afonso de Jesus, hodi kontinua lidera PNTL nu’udar Komandante Jerál PNTL Interinu to’o loron 27 marsu 2009 hodi hetan nomeasaun foun no Polítiku ba kargu Segundu Komandante Jerál PNTL nu’udar Komisáriu Polísia.

Hosi loron 27 marsu 2009, IV Governu Konstitusionál Dekreta hodi rezolve ho dalan nomeia Longuinhos Monteiro, eis Prokuradór Jerál Repúblika (PGR) hodi lidera no dezenvolve Instituisaun PNTL hamutuk ho Sekretáriu Estadu Seguransa tempu ne’ebá, Francisco da Costa Guterres. Nune’e kontinua ho Lei Orgánika PNTL ne’ebé maka hasai husi Governu RDTL iha loron 5  maiu 2004 ho estrutura maka hanesan no laiha mudansa ba diviza to’o tinan 2009.

Iha 18 fevereiru 2009, Governu hasai hikas Lei Orgánika PNTL nian ida ne’ebé uza to’o ohin loron hodi hamosu estrutura ne’ebé define Adjuntu Komandante Jerál PNTL ne’e hosi na’in-rua ba nain ida deit.  Hanesan mós re-agrupamentu ba BOP/UIR ne’ebé kompañia ketak-ketak inklui CSP no URP (COE) ba fali Unidade foun ida ho naran Unidade Especial da Policia (UEP) hodi tau hamutuk BOP, CSP no COE, alein de hamosu Estrutura Diviza ka Galhões PNTL nian hosi Nivel Estrutura lima ba nivel ka Estrutura Sanulu Resin 12 maka hanesan Ajente, Ajente Seniór, Ajente Xefe, Sarjentu, Primeiru  Sarjentu, Sarjentu Xefe, Inspektór Asistente, Inspektór, Superintendente Asistente, Superintendente, Superintendente Xefe no Komisáriu .

Iha loron 31 dezembru 2012, Misaun UNPol remata iha Timor-Leste, ho nune’e Polísia Nasional Timor-Leste mak assume responsabilidade tomak ba seguransa interna nian, hodi serbí no proteje ba komunidade no ba nasaun Timor-Leste.

Jornalista   : Nelson de Sousa

Editór         : Francisco Simões

HAKEREK NO HATÁN

Please enter your comment!
Please enter your name here