Prezidente Repúblika, Francisco Guterres Lú Olo, apresia esforsu koletivu produs livru Buibere Hamriik Ukun Rasik An. Imajen/media PR.

DILI, 08 marsu 2021 (TATOLI)—Prezidente Repúblika, Francisco Guterrese Llú Olo, ohin, deside kansela serimónia lansamentu livru “Buibere Hamriik Ukun Rasik An” nu’udar dalan prevensaun no kontrolu tanba kazu foun transmisaun lokál COVID-19 iha Dili.

Notísia Relevante: Prezidente Repúblika apresia esforsu prodús livru “Buibere Hamriik Ukun Rasik An”

“Haree ba kazu foun transmisaun lokál iha Díli, nu’udar dalan prevensaun no kontrolu ba COVID-19 atu la hadaet babeibeik, Prezidénsia Repúblika foti desizaun kansela serimónia lansamentu livru Buibere Hamriik Ukun Rasik An ne’ebé tuir planu, atu hala’o, ohin, 8 marsu 2021, tuku 16.00 lorokraik,” Prezidente Repúblika, Francisco Guterres Lú Olo, hateten liuhosi komunikadu imprensa ne’ebé Agência TATOLI asesu hosi Palásiu Prezidensiál Nicolau Lobato, Bairru Píte, Dili, segunda ne’e.

Xefe Estadu ne’e dehan, data foun ba serimónia lansamentu livru Buibere Hamriik Ukun Rasik An ne’e, sei determina tuir evolusaun moras coronavírus iha rai-laran no medida implementasaun Estadu Emerjénsia hosi Governu.

“Serimónia lansamentu livru Buibere Hamriik Ukun Rasik An ne’e marka ba 8 marsu hodi selebra Loron Internasional Feto no mós nu’udar loron ida atu fó-hanoin, rekuñese no valoriza  kontribuisaun feto Timor sira-nian  ba independénsia nasionál Timor-Leste ne’ebé fó sai iha obra koletiva ida-ne’e,” PR Lú Olo haktuir..

Lú Olo hateten, maske serimónia ba lansamentu livru ne’e kansela, Timor-Leste bele selebra nafatin Loron Internasional Feto iha ida-idak nia fatin, hahú kedas hosi uma laran, serbisu fatin no iha sosiedade, atu hamutuk luta hasoru diskriminasaun oioin hasoru feto, violénsia doméstika no abuzu seksuál ne’ebé hamosu trauma oioin.

“Ita ida-idak tenke kontribui hodi ita hotu, feto no mane, moris ho laran-hakmatek, domin no respeitu. Nune’e, ita iha garante justisa sosiál, pás no estabilidade iha ita-nia rai Timor-Leste ida livre no independente,” nia dehan.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here