Ofisiál PNTL bainhira fó seguransa. Imajen Tatoli/Dok.

DILI, 08 marsu 2021 (TATOLI)- Komandu Polísia Nasionál Timor-Leste (PNTL) Munisípiu Dili, segunda ne’e, halo enkontru koordenasaun Nivél Komandu  hodi prepara efetivu polísia sira atu halo seguransa másimu ba Serka Sanitaria ne’ebé Governu deside ona.

Notísia Relevante : Reuniaun KM: deside serka sanitária iha Dili durante loron hitu

Segundu Komandante Polísia Munisípiu Dili, Superintendente Asistente, Euclides Belo, hateten Polísia komandu Munisípiu Dili (KMD) preparadu hodi fó seguransa durante  serka sanitária (lockdown) iha kapitál Dili hodi bele halo prevensaun ba propagasaun COVID-19.

“Liu hosi enkontru ohin hodi prepara ekipa taskforce sei garante seguransa bainhira Governu iha implementasaun serka sanitaria,” Euclides Belo, hateten ba jornalista sira.

Komandu Munisípiu Dili prepara ona  efetivu  na’in-50 hodi koloka iha fatin haat ne’ebé identifika ona hanesan pontu entrada Kapitál Dili mak hanesan hosi parte Hera, Palásiu Nobre-Lahane, Manleuana, Beduku  ho Tasi-Tolu.

Eulides Belo, husu autoridade lokál, estrutura Konsellu Polisiamentu Komunitária (KPK) atu envolve fasilita operasaun hodi kontribui ba asegura serka sanitaria ho efetivu no efikásia.

Notísia Relevante : Serka Tasi-Tolu, Polísia hein orientasaun SS-CIGC

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here