Hosi: Júlio de Jesus

 Introdusaun

Hanesan ita hotu hatene katak laiha buat ida-ne’ebé permanente iha mundu ne’e no buat hotu sempre iha mudansa. Tanba ne’e, Filózofu naturalista  Eráklitu  hateten “Tudo se move, tudo se escorre, nada permanece imóvel e fixo, tudo muda e se transmuta sem exceção” (Giovanni Reale, at. all. p.23).

Haree ba prosesu hotu iha sistema edukasionál no mundu nia dezenvolvimentu, ita bele dehan edukasaun la’ós de’it fatór ida-ne’ebé permanente, maibé nia mós iha mudansa tuir mundu nia dezenvolvimentu. Matenek na’in Mária Sêrgio Cortella (2014) hateten, “Passado é referência não é direção” (p.10) nune’e mak nia bolu atensaun maka’as ba edukadór sira iha tempu ohin loron atu “repensar e refazer suas práticas, isto é, novos tempos e novas atitudes”.

Se sistema edukasionál sempre tuir laloran dezenvolvimentu nian entaun nia iha pasadu, prezente no futuru. Iha artigu ne’e atan ha’u sei hatuur hanoin balun relasiona ho tempu ohin loron nian. Cortella nia livru prinsipál ne’ebé ha’u uza mak Educação, Escola, Docência: Novos tempos, vovas atitudes (2014).  Objetivu hosi artigu ida-ne’e, tulun belun hirak ne’ebé interese ba área edukasaun hodi aprofunda sira-nia prátika pedagójika.

Pasiénsia pedagójika no pasiénsia afetiva

Termu rua ne’e ita bele hetan iha livru Cortella nian, maibé bainhira ita rezeña ho atentu mak bele deskobre. Iha kedas kapítulu I hosi livru Cortella nian ne’e fó atensaun ba edukadór sira ohin loron nian atu bele prátika termu rua ne’e ho nia kondisaun sira. Ita bele husu “saida mak pasiénsia pedagójika no pasiénsia afetiva?” 

Pasiénsia pedagójika

Pasiénsia pedagójika ne’e hanesan modelu de atuasaun ida hosi edukadór ne’ebé nakonu ho kalma hodi observa atentamente alunu sira ho ida-idak nia karáter no abilidade. Iha pontu ida-ne’e, Cortella husu atu edukadór sira tempu ohin loron nian tenke iha kapasidade ida-ne’e. Nune’e, bele atende alunu sira ho kalma no halo labarik sira sente agradável ho edukadór ne’e rasik. Tanba ne’e iha loron 15 outubru 2016, Marcelo Teixeira hakerek nia artigu ida dehan “Ser professor é ter paciência pedagógica” hodi fó énfaze ba asuntu ida-ne’e.

Tanba ne’e mak Cortella (2014) hateten, edukadór sira tenke iha “capacidade de observar as pessoas tem processos distintos de aprendizagem e de ensino, que os alunos, os colegas de profissão vivem momentos diferentes” (p.15). Iha ne’e, atan ha’u mós hakarak toka ho artigu (deskobre intelijénsia labarik sira nian tuir teoria Haward Gardner) públika iha loron 08 fevereiru 2021 iha Tatoli katak ho modelo foun ne’ebé Cortella asentua no liga ho teoria ne’e sei sai kmanek liután iha aula.

Pasiénsia afetiva

Pasiénsia afetiva ne’e hanesan modelu atuasaun ida hosi edukadór ba alunu sira la’ós de’it ho pasiénsia maibé tanba hadomi. Edukadór ida-ne’ebé pasiénsia no domin-na’in no karáter fleksivel ne’e presiza tebes iha tempu agora.

Cortella dehan pontu ida-ne’e mak importante no relevante tebes iha prosesu aprendizajen nia laran. Tanba “a capacidade de amorosidade que precisa o tempo todo cobrir qualquer ato pedagógico” (p.15). Hanoin ida-ne’e nia fundamenta iha Cortella ne’ebé hateten;

“Quem ama não desiste. Quando começamos a desistir de algo é porque estamos deixando de amar, seja o trabalho, a família, a religião, o lazer. Mas quem ama não desiste. Porque é justamente a força amorosa que nos mantém firmes no nosso propósito” (p.115).

Hanesan ita hotu rona no asesu iha kualker konversa akadémika sira katak, ohin loron hakarak ka lakohi ita tama ona ba mundu teknolójiku, mundu dijitalizadu no mundu transparente. Iha ne’e mak tuir Cortella; edukadór sira tenke haka’as-aan  liután iha preparasaun ba matéria sira, transforma matéria ne’e (up-date) no métodu ne’ebé adekuadu ho kondisaun alunu sira-nian atu alunu sira keta tau konfiansa maka’as liu ba (Mestre internet (abstrato) duke Mestre António [real]).

Buat di’ak ida ba dezenvolvimentu teknolojia nian ne’ebé avansadu, fó korajen ba alunu sira atu labele dependente demais ba edukadór no fó atensaun mós ba edukadór atu nafatin hariku-aan ho metodolojia foun sira-ne’ebé hasai hosi espertu edukasionál (pedágogu), psikólogu no filozofu sira. Tuir Cortella atu rezolve problema sira-ne’e hotu tenke halo (PPP) ka (projeto politico de pedagogia).

Nia husu atu edukadór sira hotu tenke iha (plano da aula) no kontekstualiza iha polítika edukasaun nian ne’ebé alunu sira mak sai sentru ba aprendizajen. No Cortella asentua kona-ba aula teórica e aula prática (p.57) hanesan artigu furak ida-ne’ebé hakerek hosi manorin Timor oan (Meménsio Sequeira Freitas), 25/01/2021 (Tatoli) ho nia títulu “Aula prátika no estudante sira-nia oportunidade hodi esplora aan rasik”. Hosi artigu furak ne’e mak edukadór sira bele haree oinsá alunu sira presiza edukadór sira-nia preparasaun no kreatividade ho material didátiku sira atu bele tulun alunu sira iha teoria no prátika.

Loos duni katak atu hetan edukasaun ida-ne’ebé kualifikada presiza iha kolaborasaun resíproka hosi parte Estadu, eskola, família no sosiedade sivil. Maibé hosi Estadu no sosiedade sivil karik sira-nia intervensaun iha ona nível ida-ne’ebé aas no nesesita liuliu asuntu rekursu umanu, administrativu, infraesrutura nst. Maibé ida-ne’ebé Cortella tau atensaun ba (PPP) iha Eskola atu família bele kolabora. Nune’e mak nia hateten, “é preciso ter um projeto pedagógico sólido na escolar com as famílias” (p.31). Ita-nian iha Timor fó todan de’it ba edukadór sira maske oras barak liu mak alunu hamutuk ho família.

Umildade pedagójika no kompeténsia koletiva

Umildade pedagójika no kompeténsia koletiva ne’e dehan edukadór sira iha tempu ida daudaun ne’e  presiza mós atu rona alunu sira la’ós de’it atu respeita alunu sira maibé oinsá mak bele kuda mós liberdade iha karáter alunu sira nia-aan hanesan Paulo Freire nia livro “educação como prática de liberdade”. Liután ida-ne’e mak oinsá edukadór sira aprende mós hosi estudante sira buat balu ne’ebé sira rasik mós seidauk entende. Nia hakarak dehan edukadór sira presiza umilde. 

Umildade pedagójika

(Sonimeri Cabral, at. all) hakerek artigu ida ba VI Kongresu Nasionál Eukasaun Konesidu ho títulu (Humildade pedagógica: a importância da formação continuada dos professores no século XXI). Sira esklarese Cortella nia hanoin ne’e fundamenta iha pedagogia Socrática “só sei que nada sei”.

Espresaun ne’e reprezenta Sókrates nia umildade. Tanba ne’e Cortella uza umildade pedagójika hodi hateten ba edukadór sira atu sai edukadór ne’ebé umilde no labele sente-aan katak nakonu ona no sai soberbo tiha. Tenke prátika (UP) atu bele halo buat foun nafatin.

Cortella (2014) dehan “[…] aquilo que já sei é mera repetição, mas aquilo que eu não sei é que me renova o que me faz crescer. O conhecimento é algo que me reinventa, recria, renova” (p.47). Nune’e, edukadór di’ak tenke umilde tanba umilde ne’e hanesan odamatan ba siénsia foun.  Tanba ne’e mak nia hateten, “Somente quem se deixa educar, está apto para ser educador e que uma das principais qualidades para o perfil ideal de educador escolar no século XXI é a humildade” (p.39).

Kompeténsia koletiva

Kompeténsia koletiva ne’e nia hakarak liga ba família sira hotu katak família ne’e hanesan primeira edukasaun ne’ebé labarik ida frekuenta bainhira nia eziste iha mundu ne’e. Nune’e nia husu atu família sira tenke kuda ona valór umanu ne’e ba labarik sira. Cortella fó razaun katak eskola ne’e atu reforsa tan de’it “valores esseciais” (p.105) sira-ne’ebé labarik sira iha (reforçar a escolarização dos estudantes) maibé oinsá eskola bele reforsa se família la tulun hodi kuda no husik de’it ba eskola? Signifika família mak tenke kuda uluk espíritu ne’e ba labarik sira hosi uma kedas.

Tanba ne’e mak susesu estudante nian ne’e presiza mós inan-aman nia apoiu ne’ebé konstante. Cortella katak asuntu sira hanesan ne’e tenke sai hanesan tema sentrál no husu atu sosiedade bele apoiu no labele husik de’it ba profesór ida izoladamente (p.92). Tanba tuir Cortella edukasaun ne’e tenke sai primeiru hosi família ka edukasaun hahú hosi uma [laran].

Formasaun ba edukadór sira

Atu hatan de’it ba norma bázika ne’ebé konsagra iha konstituisaun ne’e, ha’u hanoin katak ita bele hatán ona (KRDTL art. 500 nú.2). Haree ba kuantidade hosi estudante ne’ebé tinan-tinan sempre aumenta iha ensinu báziku, sekundáriu no ensinu superior. Haree ba nesesidade edukadór sira-nian no alunu sira-nian, Governu liuhosi Ministériu Edukasaun kria INFORDEPE hanesan instituisaun ida ho karáter públika hodi fó formasaun ba edukadór sira. Instituisaun ne’e nia kompeténsia atu fornese ka promove formasaun ba pesoál dosente no mós la’ós dosente ba sistema edukativu Timor-Leste nian (Decreto-lei Nº 4 /2011 de 26 de janeiro de 2011).

Ohin loron Institutu no Universidade foun mós barak ne’ebé mosu mai ho fakuldade edukasaun. Hein katak bele hetan wa’in liután edukadór sira-ne’ebé kompetente iha área hirak ne’ebé Timor nesesita. Formasaun ida oinsá mak edukadór sira presiza iha Timor? Tuir Arenaz (1988) iha modelu tolu (3) mak; Ida, dispozitivu ho potensialidade epistemolójika. Rua, teknolójia. Tolu, prátika ho nia kompreensaun rua mak (a) despozitivus hirak ne’e serve hanesan organizadór ba atividade teórika, investigativa no prátika dosente nian no (b) iha utilidade instrumentál hodi halo análize no avaliasaun krítika ba sistema edukativu.  

Nune’e, ha’u hanoin katak Estadu Timor tenke haree no tau importánsia ba formasaun dosente sira-nian. La’ós de’it iha matéria maibé tenke toka mós ba meiu teknolójiku sira atu alunu sira bele avansa la’ós de’it iha nível nasionál maibé mós rejionál no internasional. Ita ko’alia kona-ba formasaun ba edukadór sira maibé Timor tenke iha nia modelu formasaun rasik atu nune’e bele aplikável no koerente ho kondisaun Timor nian.

Tanba ne’e, hanesan estudante no sidadaun ida iha Estadu ne’e, husu ba Ministériu Edukasaun, Juventude no Desportu (MEJD) liuhosi Direção Nacional de Política, Planejamento, Moniorização e avaliação (DNPPMA) ka Direção nacional de Recursos humanos (DNRH) servisu hamutuk ho INFORDEPE hodi kria grupu entre péritu ka espertu (pedágogu) Timor-oan sira-ne’ebé iha hodi bele peskiza kona-ba “o modelo da formação dos professores em Timor-Leste”. Se ita bele halo ona nune’e mak ha’u hanoin katak ita bele prevee ona tinan 10 mai, ita sei hetan formadór sira-ne’ebé profisionál, kompetente no bele hatudu ona mai ita futuru Timor nian ho nia karáter edukasionál rasik.

Formadór ida oinsá? formadór ida-ne’ebé hatene pasiénsia, hatene hadomi ka hatene prátika pedagojia ne’ebé kobre ho domin. Hirak ne’e mak modelu prátika pedagójika foun ba formadór sira iha sékulu XXI tuir Cortella. Tuir estudu ne’ebé UNICEF halo iha tinan 2006 ho nia títulu “speak nicly to me”, peskiza ne’e uza metolojia kualitativu no kuantitativu. Sira deskobre labarik sira iha Timor sempre hetan baku no kastigu iha “família” no “eskola”.

Família no eskola

Cortella dehan família ho eskola ne’e sai pilar importante maske Estadu investe maka’as iha edukasaun maibé rua ne’e la servisu hamutuk difisil atu atinje uma educação de qualidade. Nia diresiona família nia kompeténsia mak fó formasaun ba oan sira ho valór umanu no hanorin labarik sira oinsá hadomi estudu. Nune’e, nia dehan “a base da formação integral começa já na família” no ida-ne’e mak formasaun integrál. Nia la konsidera eskola hanesan fatin ba formasaun integrál, tanba eskola ne’e hanesan instituisaun ida-ne’ebé atu eskolariza de’it estudante sira “escolarização” ne’e parte ida hosi edukasaun integrál no nia la’ós edukasaun integrál.

Atu bele to’o iha pensamentu ida Cortella nian ne’e mak família koko atu hadomi oan sira no edukadór sira labele baku estudante sira tanba (presaun psikolójika) labarik la sente livre atu aprende ho manorin ne’ebé sempre baku nia. Hanesan Freire dehan “educação da paz”, “educação do amor” no “princípio da não-violência” hosi Mahatma Ghandy.

Ana Luísa Bibe Picanço (2012) liuhosi nia Teze mestradu “A realção entre escolar e família: as suas implicações no processo de ensino-aprendizagem”, nia dehan relasaun entre família ho eskola ne’e hanesan “uma aliança parental” (p.13). Ita mós rekuñese Timor karik nia nível koñesimentu iha família barak mak labele duni to’o iha parte sira-ne’e, tanba sira la hetan edukasaun formál (kestun situasaun funu). Maibé família hirak ne’ebé kompostu hosi inan ho aman ne’ebé formadu hotu iha nível akadémiku superiór maibé oan la’o ninian no aman-inan la’o sira ninian no sira la’o keta-keta ba malu.

Perrenoud (sita hosi Pereira,2008, p.39) edukasaun presiza muda no mudansa sira-ne’e bele negosia entre ajente edukativu ne’ebé la hanesan, ida-ne’e kabe ba eskola ho nia papel atu halo nia sai vizível liután no reál liután, família tenke tau matan didi’ak ba nia, hakbesik-nia no halo nia konsiente ho nia abilidade sira be iha.

Diogo (1998) hateten “a família, espaço educativo por excelência, é vulgarmente considerada o núcleo central do desenvolvimento moral, cognitivo e afetivo, no qual se “criam” e “educam” as crianças, ao proporcionar os contextos educativos indispensáveis para cimentar a tarefa de construçãode uma existência própria” (p.37). Iha ne’e mak Cortella liga ba kompeténsia koletiva. Ajente kolaborador edukativu sira tenke sai promotor ba alunu ida-nia dezenvolvimentu edukativu.

Saida mak akontese? Iha Timor-Leste, inan no aman barak mak lori oan ba husik hela iha eskola no dezinterese, sente laiha buat ida la xoke. Edukadór balun la sente katak sai mestre ne’e don ida ka vokasaun ida. Nune’e tanba osan mak nia ba hanorin no dezinterese ba labarik sira-nia dezenvolvimentu. Iha mós alunu barak ne’ebé dezinterese ba nia vida edukativa rasik. Ho problema sira-ne’e hotu husu ba MEJD atu bele buka maneira hodi rezolve, se ita mehi atu hetan “educaçõ de qualidade”.

Konkluzaun

Edukasaun kualifikada sai mehi boot ba Timor. Oras ne’e ita tama ona ba sékulu XXI; pasiénsia, domin, umildade tenke naroman iha edukadór sira-nia aktu pedagójiku. Governu presiza regulariza eskola tantu públika kuantu privada, edukadór sira tenke hetan formasaun kontínua, peskiza ba pedagojia própria iha Timor no Governu tenke akonsella família hodi kontribui ba edukasaun ida-ne’ebé kualifikada.

*) Hakerek na’in estudante Departamentu Filozofia ISFIT.

1 KOMENTÁRIU

  1. Artigu refletivu tebes ba Mundu edukasaun ohin loron nian. Hein katak ema barak bele le Artigu Ida ne’e atu bele desenvolve karater rua nebe asentuada liu iha ita nia Artigu ne’e, liu-liu ba malirin na’in sira hodi nune’e bele produz Estudante nebe qualificado intellectualmente, afetividade no karater social liu-liu espiritualmente hodi servi Kreda no Nasaun doben Ida ne’e. Bravo Fr. Kontinua nafatin atu bele loke ema barak nia orizonte.
    Luqi

HAKEREK NO HATÁN

Please enter your comment!
Please enter your name here