Diretora Patolojia Klínika no Mikrobiolojia, Laboratóriu Nasionál Saúde, Maria Dolores de Jesus. Imajen Tatoli/Felicidade Xiemenes.

DILI, 08 marsu 2021 (TATOLI)—Diretora Patolojia Klínika no Mikrobiolojia, Laboratóriu Nasionál Saúde  (LABNAS), Maria Dolores de Jesus espresa ninia sentimentu orgullu, tanba bele serbí ema barak iha diresaun ne’e.

“Hanesan feto Timoroan, orgullu tanba serbisu iha laboratóriu hodi tulun ema barak,” Maria Dolores de Jesus hateten ba jornalista Agência Tatoli iha serbisu fatin, Bidau, segunda ne’e.

Maria Dolores de Jesus  sente katak, durante serbisu iha fatin ne’e ajuda tebes ema barak tanba rezultadu teste ba moras oioin ne’ebé sai hosi LABNAS ho kualidade, akuradu no diak duni ba komunidade.

Hanesan feto, nia sempre fiar ba profisaun nu’udár analista no kompromete atu uza didi’ak, disiplina, ho responsabilidae másima no prontu nafatin atu kontinua serbí rai ida-ne’e.

“Hosi ne’e mak hatudu katak, feto forte iha kontestu hotu-hotu no sai ezemplu ba oan-sira, família no sosiedade,” nia subliña.  

Durante haknaar aan iha LABNAS, Maria Dolores de Jesus sempre prontu ho nia-papél atu orienta tékniku-sira, tau konfiansa ba sira, hametin domin no kria ambiente ne’ebé hakmatek no seguru.

Iha tarrefa serbisu Patolojia Klínika no Mikrobiolojia ne’e fahe ba grupu tolu mak hanesan A, B no C  ne’ebé halo rotasaun, balun ba terrenu hodi foti amostra, balun simu hodi konfirma,  balun arruma amostra halo didi’ak  ba  hatama  iha sala analiza PCR no halo teste.

Durante fulan fevereiru to’o 2 marsu 2021, Laboratóriu Nasionál Saúde halo teste ba amostra hamutuk rihun 10-resin.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here