Produtu Cesta Bázika. Imajen Tatoli/Antónia Gusmão.

VIQUEQUE, 08 marsu 2021 (TATOLI)–Komunidade iha suku Uma Uain Leten, postu administrativu Viqueque, munisípiu Viqueque, seidauk simu Cesta Bázika, maski iha suku seluk iha postu ne’e simu ona.

“To’o agora komunidade suku Uma Uain Leten hamutuk 1.600 maka seidauk simu Cesta Bázika,” Xefe suku Uma Uain Leten, Atino Sarmento, informa ba Agência TATOLI, bainhira partisipa iha sosializasaun mapamentu risku dezastre naturál, ne’ebé realiza hosi Institutu Petróleu no Jeolojia (IPG, sigla portugés), segunda ne’e.

Notísia relevante: Governu deside hapara provizóriu distribuisaun Cesta Bázika iha kapitál Dili

Tuir líder komunitáriu ne’e, totál populasaun suku ne’e hamutuk 2.893, komunidade 1.000-resin mak simu ona enkuantu seluk seidauk.

“Ha’u la hatene problema saida, maibé ein prinsípiu desde 22 fevereiru bainhira halo distribuisaun ne’e, Administradór postu administrativu Viqueque hamutuk ho Ministériu Turizmu, Komérsiu no Indústria, halo lansamentu no kompañia hahú fornese Cesta Bázika, maibé kompañia derepente para tanba tuir informasaun katak laiha osan atu hola produtu, ne’ebé agora to’o semana rua ona atividade paradu to’o ohin loron,” nia haktuir.

Autoridade lokál ne’e ladún lembra kompañia fornesedór nia naran, maibé realidade hapara ona distribuisaun tanba problema finanseiru.

Tanba ne’e, nia husu Governu liuhosi ministériu implementadór atu rezolve kestaun ne’e.

“Ha’u hanesan autoridade lokál suku Uma Uain Leten, husu implemetadór programa Cesta bázika rezolve kestaun ne’e, nune’e povu mós bele hetan sira-nia direitu,” nia hatutan.

Antes ne’e, ministériu implementadór hasai despaisu hodi estende tempu distribuisaun Cesta Bázika to’o 31 marsu, maibé ho aplikasaun serka sanitária iha Dili hahú loron 09 to’o 15 marsu, maka Ministériu Koordenadór Asuntu Ekonómiku deside suspende provizóriu atividade distribuisaun iha kapitál Dili, maibé distribuisaun iha munisípiu seluk kontinua.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here