Mapa munisípiu Viqueque. Imajen/Espesiál

VIQUEQUE, 08 marsu 2021 (TATOLI)—Komandu Polísia munisípiu Viqueque monta postu provizóriu iha pontu entrada munisípiu, atu nune’e bele kontrola movimentu ema tama-sai munisípiu ne’e no prevene transmisaun COVID-19.

“Agora aplika serka sanitária iha Dili, atu ema labele tama-sai no evita ema hosi Dili mai Viqueque, ami monta postu provizóriu ida iha Ossu ne’ebé iha ligasaun hosi Dili labele utrapasa liu Baucau atu mai liu iha ne’e, nune’e evita movimentu hosi Dili mai Viqueque,” Segundu Komadante Polísia Viqueque, Superintendente Asistente Inâncio Amaral, informa ba Agência TATOLI, iha salaun administrasaun munisípiu Viqueque, bainhira partisipa sosializasaun no mapamentu risku dezastre naturál ne’ebé realiza hosi Institutu Petróleu no Jeolojia (IPG, sigla portugés), segunda ne’e.

Tuir nia, iha pontu entrada sei halo vijilánsia no pasa revista movimentu ema no sasán.

“Kuandu desizaun tun, Komandu munisípiu Viqueque prontu atu ezekuta orden hosi Komadu Jerál Polísia Nasionál Timor-Leste (PNTL),” nia akresenta.

Parte Komandu Polísia munisípiu Viqueque sei koordena ho autoridade lokál sira atu halo vijilánsai no pasa revista ba ema no movimentu transporte públiku.

“Situasaun seguransa ein jerál iha munisípiu ne’e kontrolandu hela, maski komunidade pániku ho alastrasaun pandemia COVID-19, maibé situasaun la’o ho normál. Ita hotu ezekuta no obedese ba Estadu no ita-nia komunidade mós konsiente, tanba ne’e maka garantia situasaun ne’e la’o ho normál to’o agora,” nia hatutan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here