IPG entrega mapa área risku dezastre naturál iha Viqueque ba autoridade, iha salaun administrasaun munisípiu Viqueque, segunda (08/03). Imajen/Natalino Costa

VIQUEQUE 08 marsu (TATOLI)—Institutu Petróleu no Jeolojia (IPG, sigla portugués) entrega mapa zona poténsia risku dezastre naturál tipu tolu hanesan rai-halai, inundasaun no rai-nakdoko, ba Adjuntu Administradór munisípiu Viqueque, José da Costa Sousa.

Tuir Diretór Risku Jeolójiku hosi IPG, Eugênio Soares, mapa tolu ne’ebé entrega bazeia ba estudu prelemináriu ne’ebé antes ne’e institutu halo ona.

“IPG halo kooperasaun ho universidade iha Amérika iha tinan 2014 no konsege monta ekipamentu sismulójiku hodi deteta rai-nakdoko no rai-halai. Tanba ne’e, ohin konsege entrega mapa,” Diretór ne’e informa liuhosi intervensaun iha ámbitu sosializasaun risku dezastre naturál, iha salaun administrasaun munisípiu Viqueque, segunda ne’e.

Notísia relevante: IPG halo sosializasaun-estudu mapamentu risku dezastre naturál iha Viqueque

Nia refere ba risku inundasasaun, daudaun ekipa IPG sei halo identifikasaun.

“Mapa ikus ohin ne’ebé ha’u entrega, ida marka mean hanesan área risku inundasaun, tanba ne’e ami presiza halo estudu atu hatene liu tan risku fatin sira iha minisípiu Viqueque,” nia akresenta.

Bazeia ba instrumentu sízmiku ne’ebé IPG monta iha Viqueque, deteta katak postu administrativu  acluta, Ossu, Uatucarbau, Viqueque no Uatulari risku ba rai-nakdoko, rai-halai no inundasaun.

“Tanba ne’e, husu ba komunidade munisípiu Viqueque atu kolabora ho IPG hodi fó susesu ba peskiza, nune’e ba futuru hanesan alerta ida hodi bele dook-an hosi fatin risku ba dezastre naturál,” nia fó hanoin.

Iha fatin hanesan Admistradór Uatulari, Tomas da Silva, hateten postu ne’e protu kolabora ho ekipa IPG hodi halo estudu mapamentu.

Nune’e mós, Xefe suku Matahoi, postu administrativu Uatulari, António Amaral, kompromete sei kolabora ho di’ak hodi fó susesu ba peskiza ne’e.

“Ha’u no komunidade sei kolabora no fasilita IPG hodi halo sira-nia estudu mapamentu ho di’ak,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here