Estudante sira Eskola Sekundária Katólika Nossa Senhora de Fátima (NOSSEF) Railaco tuir hela ezame. Imajen Tatoli/António Gonçalves

DILI, 08 marsu 2021 (TATOLI)—Governu liuhosi Ministériu Edukasaun, Juvetude no Desportu (MEJD), deside suspende provizóriu prosesu aprendizajen iha munisípiu Dili, hahú oras 00:00 loron 09 to’o 15 marsu.

“Ita deside suspende prosesu aprendizajen iha munisípiu Dili tomak, hahú aban to’o 15 marsu kalan,” Ministru Edukasaun, Juvetude no Desportu, Armindo Maia, informa hafoin reuniaun Konsellu Ministru estraordinária, iha edifísiu Ministériu Finansa, Aitarak-laran, segunda ne’e.

Notísia relevante: Reuniaun KM: deside serka sanitária iha Dili durante loron hitu

Ministru dehan, hafoin ekipa Ministériu Saúde (MS) no Sala Situasaun Sentru Integradu Jersaun Krize (CIGC, sigla portugés) iha loron domingu kalan (07/03) deteta sidadaun rua pozitivu COVID-19 iha área BTN II Tasi-tolu, aldeia Terra Santa, suku Madohi, postu administrativu Dom Aleixo, munisípiu Dili, no daudaun tama ona ba sala izolamentu Tasi-tolu.

“Horikalan foti kedan desizaun suspende provizoriamente eskola hosi Mota Comoro (ponte CPLP) to’o Tasi-tolu, maibé ohin Konsellu Ministru deside aplika serka sanitária iha munisípiu Dili, no ha’u sei hasai despaisu atu suspende prosesu aprendizajen tomak iha munisípiu Dili,” nia akresenta.

Biban hanesan, Ministru Ensinu Superiór, Siénsia no Kultura, Longuinhos dos Santos, reforsa atividade aprendizajen ba ensinu superór iha kapitál Dili mós sei suspende hotu durante semana ida nia laran.

Razaun ezekutivu sira deside suspende provizóriu tanba atu evita kontájia COVID-19, maka’as liu iha Dili.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here