DILI, 08 Marsu 2021 (TATOLI)—Governu liuhosi Sekretário do Estado para a Comunicação Sociál (SECOMS), husu ba komunidade labele pániku ho COVID-19 ne’ebé daudaun ne’e iha ona transmisaun lokál maibé husu  kumpre nafatin regra protokolu saúde ne’ebé fó sai hosi Ministériu Saúde.

Notísia Relevante: Testemuña pasiente COVID-19 hosi BTN-II Tasi-Tolu

Secretário do Estado para a Komunicação Sociál, Merício Juvinal dos Reis “Akara” hateten, Governu apela ba komunidade munisipiu Dili nafatin hakmatek no kumpre de’it Protokolu saúde no medida prevensaun ne’ebé estabelese hosi Ministériu Saúde nian.

Nia hatutan, komunidade sira ternke uza nafatin máskara, fase liman bebeik ho sabaun, uza hand sanitizer, labele halibur malu iha grupu, mantein nafatin distánsia sosiál, atun nune’e bele prevene aan hosi COVID-19.

“Husu ba públiku lalika pániku no hotu-hotu kolabora ho Ministériu Saúde atu ita bele kontrola situasaun no kria situasaun ne’ebé hakmatek. Ita fó biban ba ekipa Task Force COVID-19 atu halo sira nia servisu ho efikáz no rona halo tuir nafatin orientasaun sira hosi sala situasaun Sentru Integradu Jestaun Krize (CIGC),” Merício Juvinal dos Reis “Akara” hato’o deklarasaun ne’e, relasiona ho kazu pozitivu COVID-19 iha área BTN II Tasi-Tolu, Aldeia Terra Santa, Suku Madohi, Postu Administrativu Dom Aleixo, Munisípiu Dili, ne’ebé fó sai loron 07 fulan-marsu tinan 2021 liuhosi komunikadu ne’ebé Agência TATOLI asesu segunda ne’e.

Nia dehan, komunidade labele pániku tanba Governu sei halo esforsu másimu hamutuk ho komunidade tomak sei jere no rezolve COVID-19 ne’e ho di’ak iha Dili no iha teritóriu Timor-Leste tomak

Jornalista: Arminda Fonseca

Editór: Cancio Ximenes

 

HAKEREK NO HATÁN

Please enter your comment!
Please enter your name here