Imajen/facebook.

DILI, 08 marsu 2021 (TATOLI)—Timoroan na’in 106 ne’ebé selesionadu nu’udár formadór nasionál, hahú formasaun lian portugés durante fulan tolu, hodi bele oferese fali formasaun ba profesór-sira. 

Vise Ministru Edukasaun Joventude no Desportu (VMEJD), António Guterres ne’ebé halo abertura ba formasaun ne’e, husu no enkoraja Timoroan hirak ne’e atu tuir formasaun ne’e kompleta loloos oras 360.

“Signifika durasaun ba formasaun ne’e sei hala’o durante fulan tolu no tenki prienxe oras 360 ne’ebé termina ona,” António Guterres hateten iha salaun Ian Martin Matadouru, segunda ne’e.

Formasaun ne’e rasik sei hala’o ho modalidade online no aula prezensiál, tanba ne’e António Guterres husu ba formadór-sira atu haree mós katak, bainhira situasaun la permiti atu halibur-malu liu na’in 10, bele utiliza medida online.

Formasaun ne’e rasik nu’udár programa pró-portugés ne’ebé Ministériu Edukasaun Joventude no Desportu trasa atu bele kapasita Timoroan-sira, nune’e bele tulun profesór-sira iha TL.

Profesór portugueza na’in-lima mak oferese formasaun ba formadór nasionál hirak ne’e, tanba serbisu hamutuk entre Governu Timor-Leste liuhosi Instituto Nacional de Formação  de Docentes  e Profisionais da Educação (INFORDEPE) ho Governu Portugál.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here