Koordenadora Oragnizasaun The Corner Store Network Timor-Leste Preserving the Feature (TCSN-sigla inglés), Joana Guterres Gusmão. Imajen/Espesiál.

DILI, 08 marsu 2021 (TATOLI)—Koordenadora Oragnizasaun The Corner Store Network Baguia (TCSN-sigla inglés), Joana Guterres Gusmão, hateten mane tenke valoriza no respeita feto nia desizaun iha karreira ka atividade saida de’it tanba feto mós sai impotante no sai xave ba dezenvolvimentu nasaun nian.

Notísia Relevante: Parpol presiza hatuur iha estatutu kona-ba envolvimentu feto iha polítika

“Ha’u-nia hanoin komemorasaun loron mundiál ba feto iha Timor-Leste ne’e, tempu to’o ona atu mane sira tenke fó oportunidade ba feto sira foti desizasaun iha karreira ka atividade saida de’it mak feto hili, tanba feto mós hola parte ka sai xave ba dezenvolvimentu nasaun nian,” Joana Guterres Gusmão hateten ba Agência TATOLI liuhosi telefónika, segunda ne’e.

Nia hateten, mane presiza fó oportunidade ba feto sira tanba daudaun ne’e Timor-Leste feto barak ne’ebé iha esperiénsia no matenek ne’ebé barak, maibé dala barak feto la’ós iha oin tanba sistema patriarkál uluk nian sei domina katak feto nia servisu mak haree de’it uma laran.

“Enatun ema barak ne’ebé la fó oportunidade ba feto maluk sira atu hatudu sira-nia kapasidade no kuñesimentu ne’ebé mak sira iha,” nia dehan.

Tanba ne’e, nia hateten, atu prevene ka hamenus sistema patriarkál sira ne’e mak feto tenke presiza brani atu hatudu ba mane no sosiedae katak feto mós bele.

“Ha’u-nia maluk feto sira, ita tenke brani ba buat ne’ebé viola feto-nia direitu no hatudu ita-nia matenek no abilidade, kapasidade ne’ebé mak ita iha presiza hatudu. Tanba, agora daudaun ne’e feto mós sai xave importante ba iha dezenvolvimentu nasaun nian,” nia haktuir.

Nia argumenta, feto tanke brani hasoru dezafiu ka ideia ne’ebé sempre mosu atu kontra ka viola feto-nia direitu tanba feto iha fízikamente la hanesan ho mane maibé abilidade ka manenek ne’ebé feto iha, bele fó benefísiu ba komunidade ka nasaun.

“Bainhira ita la brani atu la’o entaun ita mak hakarak atu hamate fila-fali ita-nia mentalidade matenek no abilidade ne’ebé mak iha. Ita-nia matenek mak ita-nia riku-soin,” Joana Guterres Gusmão hateten.

Nia afirma, feto dala barak la ba oin tanba sistema patrilinear ne’e sei iha, ne’ebé sempre hamosu violénsia domestika.

“Violénsia domestika mosu ne’e tanba uma laran laiha igualidade jéneru ka estabilidade. Tanba família barak sei lori nafatin mentalidade uluk nian ka patrilinear katak feto nia servisu mak iha uma de’it. Entaun, ema barak sempre kria violénsia ka kontra direitu feto nian,” nia dehan.

Jornalista: Arminda Fonseca 

Editór: Cancio Ximenes

HAKEREK NO HATÁN

Please enter your comment!
Please enter your name here