Koordenadór Forsa-Tarefa ba Prevensaun no Mitigasaun surtu COVID-19, Rui Maria de Araújo. Imajen TATOLI/Egas Cristóvão.

DILI, 07 marsu 2021 (TATOLI)–Koordenadór Forsa-Tarefa ba Prevensaun no Mitigasaun surtu COVID-19 iha Timor-Leste, hosi Sala Situasaun Sentru Integradu Jestaun Krize (CIGC, sigla portugés), Rui Maria de Araújo, deklara rezultadu teste laboratóriu hatudu katak ajudante no motorista Bus Mabenifa negativu.

Sidadaun rua ne’e submete ba teste swab tanba bazeia ba rezultadu teste hosi ekipa saúde, deteta pasajeiru ida iha bus ne’e pozitivu.

Bus  Mabenifa sai hosi Dili bá Baucau iha 01 marsu no  to’o iha Baucau tuku 8 kalan.

Tuir Koordenadór Forsa-Tarefa, seidauk iha evidénsia ne’ebé hatudu iha relasaun entre kazu Baucau ho na’in-rua ne’ebé pozitivu iha área BTN II Tasi-tolu, aldeia Terra Santa, suku Madohi, postu administrativu Dom Aleixo, munisípiu Dili, maibé sidadaun rua viziñu ho pasiente COVID-19 hosi Baucau.

“Loron hirak liubá, bainhira ha’u hateten katak kazu ida Baucau iha faze rekuperasaun, signifika iha momentu ekipa saúde deteta tanba nia iha ona faze rekuperasaun, entaun probabilidade atu hada’et tutan ba ema seluk ki’ik iha momentu ne’ebé deteta iha loron 02 marsu, maibé iha loron hirak ba kotuk ne’e ita lahatene nia iha kontaktu ho sé? Hosi buat ne’ebé nia hateten katak la halo viajen ba fatin ruma, hela de’it iha uma no la halo kontaktu ho ema barak,” Koordenadór Forsa-Tarefa informa liuhosi konferénsia imprensa ne’ebé realiza iha Sentru Konvensaun Dili (CCD, sigla portugés), domingu ne’e.

Notísia relevante: COVID-19: pozitivu lima hosi Covalima, ida hosi Baucau

COVID-19: CIGC blokeia temporária aldeia Terra Santa tanba deteta pozitivu-rua

Rezultadu hosi ema sira kontaktu ho kazu pozitivu, liuliu ema uma laran, hatudu rezultadu negativu, nune’e mós ba sira ne’ebé nia kontaktu iha Baucau.

“Bainhira pasiente pozitivu ne’e ba iha Baucau iha loron 01 marsu, iha loron tuir mai halo kedan teste, no iha loron 04 mak lori mai Dili. Iha períodu ida-ne’e mak nia iha kontaktu ho ema, no sira ne’e hotu rezultadu negativu inklui motorista ho ajudante,” nia haktuir.

Tuir Koordenadór Forsa-Tarefa, vírus kuandu hetan kontaktu ho vírus iha períodu loron-lima, dahuluk hanesan períodu enkubasaun.

“Signifika vírus ne’e foin dezenvolve nia-an hosi loron-lima ba oin no posibilidade atu hada’et ba ema ne’e boot tebes, ema balun to’o semana tolu sei nafatin maibé ema balun mós lais liu. Iha kazu ida Baucau, vírus iha pasiente nia isin hatudu katak tama ona rekuperasaun, loron sira tuir-mai kuandu halo fali teste rezultadu negativu tiha ona,” nia esplika.

Maski nune’e, tuir Portavós Sala Situasaun CIGC, la halakon posibilidade katak iha loron 02 marsu ba kotuk to’o semana datoluk fulan-fevereiru ne’e posibilimente bele hada’et moras ne’e ba ema ruma.

“Haree hosi istória viajen ne’ebé nia rasik la rekoñese katak nia halo viajen ba rai-li’ur, posibilidade ida-ne’e transmisaun komunitária maibé esforsu atu buka tuir informasaun hatudu katak ema ne’e ninia família iha Atambua (Indonézia), tanba ne’e posibilidade nia halo viajen ba iha ne’ebá, maski nia rasik la rekoñese,” nia konta tuir.

Sala Situasaun CIGC no Ministériu Saúde seidauk bele determina loloos, kazu pozitivu iha bairru BTN II hanesan importadu ne’ebé hahú hada’et no halo transmisaun lokál ka kazu transmisaun komunitária ida.

“Independentemente hosi transmisaun lokál ka transmisaun komunitária, kazu foun rua ne’e hatudu katak nia hada’et maka’as iha zona ne’ebá ona,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here