Diretór Asosiasaun Naroman ba Futuru, Frederico Hornay. Imajen/Espesiál.

DILI, 08 marsu 2021 (TATOLI)–Diretór Asosiasaun Naroman ba Futuru Frederico Hornay, husu ba Governu atu promove Grupu Defisiénsia Moris Buka Rasik ninia produtu fugaun Timor.

Nia hatutan, Governu presiza tau matan no promove sira-nia produtu tanba grupu kooperativa ne’ebé sira halo la’os fó servisu de’it ba ema ho defisiénsia de’it maibé involve mós ema normál hodi kaer servisu.


Fugaun Timor ne’ebé prodús hosi Grupu Defisiénsia Moris Buka Rasik. Imajen/Espesiál.

 “Objetivu ami halo produsaun fugaun Timor, tanba ita-nia Governu ko’alia kona-ba polítika meiu ambientál nian katak komunidade labele estraga ai-horis. Entaun, ami iha inistiva halo fungaun Timor atu nune’e uza de’it mak fugaun labele tesi ai arbiru. Tanba ne’e mak ami presiza tebes Governu nia apoiu atu promove ami-nia produtu sira, nune’e ema bele sosa, hodi hapara estraga meiu ambiente, tanba fugaun uza tein ne’e uza ai-uut,” Diretór Asosiasaun Naroman ba Futuru, Frederico Hornay, hateten ba Agência TATOLI liuhosi telefónika, segunda ne’e. 

Nia dehan, kona-ba materiál atu halo produasaun ba fugaun Timor ne’e sira hetan apoiu hosi Sekretáriu Estadu Formasaun Profisionál (SEFOPE) maibé atu promove para ema sosa ne’e mak laiha apoiu. 

“Kona-ba materiál ami iha, tanba hetan apoiu hosi SEFOPE. Maibé, bainhira ami prodús tiha fugaun, ema atu ajuda promove ami-nia produtu mak laiha, entaun produtu sira ne’e halo tiha rai de’it. Tanba ne’e, presiza Governnu apoiu hodi promove ami-nia produtu fugaun Timor ne’e,” nia hateten.

Nia dehan, antes ne’e United Nations Development Programme (UNDP) mak ajuda sira hodi promove sira-nia produtu maibé projetu ne’e la’o to’o tinan ida de’it.


Fugaun Timor ne’ebé prodús hosi Grupu Defisiénsia Moris Buka Rasik. Imajen/Espesiál.

“UNDP nia ajuda ne’e, ami konsidera projetu pillotu ida tanba ninia kontinuasaun laiha. Momentu sira fó konfiansa mai ami, ami prodús fugaun, ami distribui mak ami hatama relatóriu ba sira kada fulan, hanesan mós fó ami-nia envoice ba sira, no ami faan tiha ba komunidade. Ami konta ninia kuantidade mak ami halo envoice no hatama ba sira mak selu ami. Maibé, agora projetu ne’e paradu ona no ami mesak laiha ema atu apoiu,” nia dehan.

Nia afirma, Asosiasaun Naroman Ba Futuru iha ninia departamentu haat mak hanesan, Defisiénsia moris buka rasik, ninia abilidade prodús fugaun Timor; Naroman ba moris foun, ninia atividade mak poupansa no emprestimu; Forum Juventude Defisiénsia ninia atividade mak halo dosi no Grupu hortikultura Timor-Leste nia atividade mak kuda modo. 

Jornalista: Arminda Fonseca 

Editór: Cancio Ximenes 

HAKEREK NO HATÁN

Please enter your comment!
Please enter your name here