Estrutura ORHF halo konferénsia imprensa iha salaun Otél Luz Clarita, Dili, 06 marsu 2021. Imajen Tatoli/Egas Cristóvão

DILI, 06 marsu 2021 (TATOLI) – Organizasaun Rezisténsia Hametin FRETILIN (ORHF), sábadu ne’e, ofisiálmente hamriik hanesan organizasaun masa hodi konsolida nia kbiit fó  apoiu másimu ba vitória partidu Frente Revolucionária de Timor-Leste Independente (FRETILIN) iha 2023.

Liuhosi serimónia estabelesimentu ofisial ORHF ne’ebé hala’o iha Salaun Otél Luz Clarita, Dili, Abílio Mesquita “Mausoko” nu’udar prezidente ORHF, afirma ba membru tomak atu fila ba ida-idak nia munisípiu no ida-idak nia knua hodi servisu maka’as lori duni votoria ba FRETILIN iha eleisaun jerál 2023.

Abílio Mausoko afirma   se hakarak mehi FRETILIN nia ukun sai realidade 2023, la’ós fila ba tuur hein de’it hodi “mehi”  FRETILIN manan iha 2023. Maibé tenke servisu mak’aas atu “mehi” ne’e sai realidade.

ORHF hamriik, Abílio Mausoko hateten, tanba preokupa ho destinu rai ida-ne’e nian’ ne’e duni kontribuisaun ORHF nian laiha rezerva tenke fó hotu hodi lori vitória ba FRETILIN.

“Ha’u husu ba ita-boot sira ne’ebé mak simu ona estatutu ORHF nian, maiske ho simbólikamente de’it, maibé fó ona dalan ba ita-boot sira ne’ebé reprezenta juventude munisípiu sira atu hahú ona servisu maka’as hodi lori FRETILIN ba ukun iha 2023,” Abílio Mausoko hateten..

ORHF hamriik atu hametin no apoiu polítika partidu FRETILIN nian atu fila fali lori FRETILIN manán ukun iha 2023.

Membru CCF, José Manuel Fernandes “Nakfilak”. Imajen Tatoli/Egas Cristovão

Iha biban ne’e, membru Komité Sentrál   FRETILIN (CCF), José Manuel Fernandes “Nakfilak”, afirma ORHF naran mak foun, maibé ema la’ós foun. Tanba ne’e, ORHF sei hamutuk ho organizasaun sira seluk iha FRETILIN nia mahan servisu maka’as liután hodi manan ukun iha 2023.

“FRETILIN fila bá ukun mak rai ne’e bele hetan loloos dalan ba dezenvolvimentu,” José Manuel “Nakfilak” afirma.

Nia dehan, hadi’a edukasaun no hadi’a ekonomia iha rai ne’e bainhira FRETILIN kaer ukun. Tanba ne’e, membru hotu ORHF tenke kompromete servisu  ba vitória FRETILIN iha 2023.

Inan-aman barak, José Nakfilak hatutan, la goza ukun an ne’e, maibé tenke kompromete katak FRETILIN ukun atu fó moris di’ak ba oan sira. Tan ne’e, hahú agora bá oin aman-inan sira tenke servisu maka’as.

“Ha’u fiar ita boot sira tanba dominasaun ema seluk nian mak ohin ita fila-fali mai hamutuk hodi harii ORHF hodi lori FRETILIN atu merese ukun duni rai ida-ne’e,” José Manuel “Nakfilak” tenik.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here