Sirkunstánsia jeográfika iha liña fronteira Suku Belulik Leten-Fatuemean, ne’ebé baliza ho Postu Tasi Feto, Belu, Indonézia ho de’it distánsia kilómetru 2,8. Imajen Satélite/Espesiál

COVALIMA, 06 marsu 2021 (TATOLI)- Xefe Suku Belulik Leten, Postu Administrativu Fatumean, Munisípiu Covalima, Quintino José Amaral, lamenta ho mekanizmu no burokrasia iha Administrasaun Munisípiu Covalima ne’ebé to’o agora prejudika povu Fatumean, seidauk bele simu ajudu umanitáriu emerjénsia hosi Governu.

Xefe Suku Quintino José Amaral. Imajen Tatoli/Eugénio Pereira

Xefe Suku Belulik Leten, Quintino José Amaral, informa apoiu foos saka 480 hosi Governu sentrál to’o tiha ona Administrasaun Munisípiu Covalima no rai hela iha Armazén Ministériu Solidariedade Sosiál no Inkluzaun nian, semana rua liubá, maibé seidauk  bele distribui ba povu Fatumean tanba tenke hein tan dokumentu komprovativu balun ka proposta hosi autoridade relevante sira.

Notísia Relevante : Postu Administrativu Fatumean-Maucatar stoke foos komesa hotu

“Ami lamenta tebes no rona dehan sei trata dokumentu balun maka foin haruka foos mai, maibé agora povu iha ona faze hamlaha, tanba foos iha Fatumean rasik la iha ona dezde Governu taka movimentu ne’e,” Xefe Suku , Quintino José Amaral, informa ba jornalista iha Fatumean, sábadu ne’e.

Nia husu ba Administradór Covalima atu koordena ho sira hodi halo distribuisaun foos ne’e ba populasaun ne’ebé presiza tebes ai-han.

Iha fatin hanesan, Administradór Postu Administrativu Fatumean, Filomeno Cardoso, lamenta ho prosesu burokrasia naruk ne’ebé afeta ba prosesu distribuisaun foos ba povu afetadu sira iha situasaun pandemia COVID-19 no serka sanitaria ka lockdown.

“Ha’u simu ona kontaktu dehan foos ne’e atu mai, maibé to’o agora ami rasik hein foos la mai halo povu rasik lamenta, tanba stoke foos la iha no presu foos rasik ema fa’an $17.00 kedas kada saku,” nia hateten.

Filomeno dehan, tuir desizaun Governu sentrál fó apoiu foos saka 480 ne’e atu fahe abitante uma-kain 980.

Postu Administrativu Fatumean kompostu hosi Suku Nano, Belulik Leten, no Fatumea ho aldeia hitu (7)  ho totál abitante 4,286 ameasa.

Agência Tatoli tenta konfirma situasaun ne’e ho Administradór Covalima, Afonso Nuquera, maibé seidauk fó informasaun no fó entrevista ho jornalista sira tanba okupadu ho servisu.

 Jornalista     : Eugénio Pereira

Editór            : Francisco Simões

 

HAKEREK NO HATÁN

Please enter your comment!
Please enter your name here