Diskusaun proposta OJE 2021 iha sala plenária Parlamentu Nasionál. Imajen TATOLI/Egas Cristovão

DILI, 05 marsu 2021 (TATOLI)—Tribunál Rekursu (TR) foti ona desizaun no konsidera pedidu Bankada Kongresu Nasionál Rekonstrusaun Timor (CNRT, sigla portugés) kona-ba legalidade Orsamentu Jerál Estadu (OJE) 2021, improsedente (laiha fundamentu), nune’e OJE tinan ne’e tuir konstituisaun no lei.

Prezidente Parlamentu Nasionál, Deputadu Aniceto Longuinhos Guterres Lopes, simu ona notifikasaun hosi Tribunál Rekursu ne’e iha loron kinta, 4 marsu 2021.

Nia dehan, TR notifika liuhosi akordaun ne’ebé sai ona kona-ba pedidu inkonstitusionalidade no ilegalidade balun ne’ebé hatama hosi bankada CNRT.

Nune’e, ohin, Prezidente Parlamentu Nasionál ne’e sei distribui ba bankada parlamentár idak-idak atu hatutan informasaun ba deputadu sira hotu.

Prezeidente PN, Aniceto Longuinhos Guteres Lopez. Imajen TATOLI /Antonio Goncalves

“Tribunál Rekursu rejeita hotu sira-nian (bankada CNRT) pedidu, lian portugés dehan tribunál julga  improsedente ba pedidu sira-ne’e. Sira-nia pedidu deklarasaun inkonstitusionalidade no ilegalidade ne’e lima ka neen hanesan ne’e hotu-hotu improsedente. Signifika Orsamentu Jerál Estadu 2021 konstitusionál no legál”, Aniceto Guterres informa liuhosi konferénsia imprensa, iha uma fukun, sesta ne’e.

Iha loron 04 marsu 2021 ne’e, Prezidente TR, Deolindo dos Santos, hateten sei foti desizaun ba fiskalizasaun abstrata hosi bankada CNRT iha tempu opurtunu

“Matéria ne’e sei pendente hela iha Tribunál Rekursu no sei deside iha tempu ne’ebé ke opurtunu. Tribunál Rekursu sei la ultrapasa prazu legál ne’ebé ke lei rasik estabelese no sei deside tuir regra prosesu sivíl nian,” Prezidente Tribunál Rekursu Deolindo dos Santos, informa ba jornalista sira, iha Parlamentu Nasionál, kinta ne’e.

Purtantu Vise-Xefe Bankada CNRT, Deputadu Patrocínio Fernandes dos Reis, hateten fiskalizasaun abstrata ne’e akontese tanba OJE 2021 viola regra konstitusionál no Lei Orsamentu no Jestaun Finanseira (LOGF-sigla portugés).

Nia dehan, bankada CNRT halo pedidu fiskalizasaun abstrata ba OJE 2021, tanba artigu 150, alínea (e) husi Konstituisaun-da-Repúblika maka fó dalan.

Bankada CNRT laiha intensaun atu blokeia funsionamentu Governu nian ka impede OJE 2021, maibé bankada CNRT konsidera OJE 2021 viola regra konstitusionál no LOGF.

Prezidente PN simu notifikasaun iha loron 12 janeiru liubá no fó resposta iha loron 12 fevereitu 2021.

PN sei hatán notifikasaun TR kona-ba fiskalizasaun abstrata ba OJE 2021

TR sei deside pedidu fiskalizasaun bankada CNRT iha tempu oportunu

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here