organizasaun internasionál defeza sivíl (ICDO, sigla ingles). Imajen/Google

DILI, 05 marsu 2021(TATOLI)-Diretór Jerál Sekretáriu Estadu Protesaun Sivíl (SEPS), Superintendente Xefe, Ismael Babo, informa Timor-Leste seidauk sai hanesan membru  ba  International Civil Defence Organisation  (ICDO).

Diretór Jerál Protesaun Sivíl, Superintendente Xefe  Polísia, Ismael da Costa Babo. Imajen/MI

ICDO nu’udar organizasaun entre Governu sira ne’ebé sai membru ba organizasaun ne’e  ho objetivu atu kontribui ba malu hodi garante protesaun no apoia ba povu no dezenvolvimentu nasaun sira ho serteza ba próteze povu iha dezastre naturaís no apoiu umanitária.

ICDO ne’e harii ka estabelese iha tinan 1931. To’o agora ICDO iha nia membru nasaun 57; kompostu hosi nasaun 18 hanesan nasaun observadór no nasaun 23 hanesan membru afiliasaun.

Notísia Relevante : Loron mundiál defeza sivíl, autoridade integradu Estadu presiza halo reflesaun

ICDO hahú iha tinan 1931 iha Paris no Jenerál ida espesialista iha area forensik, Fransa nian,  George Saint-Paul maka harii Asosiasaun Zona Jeneva, hodi sai aliserse ba organizasaun defeza sivíl.

Kada tinan, Estadu sira iha mundu selebra loron mundiál  Defeza Sivíl (World Civil Defence Day) iha loron 03 fulan  marsu. Atu  konsidera hanesan memória ba loron-ne’e nasaun lubun mak harii ka estabelese ona organizasaun ida naran organizasaun internasionál defeza sivíl (ICDO, sigla ingles).

Ismael Babo, hateten to’o agora TL seidauk sai membru ba ICDO maibé Timor-Leste  nu’udar Estadu parte ba membru Nasaun Unida  ratifika ona konvensaun ba  redusaun risku dezastre ne’ebé mak iha giaun Nasaun  Unida adopta oinsá mak halo iha siklu dezastre naturaís, hanesan prevensaun, metigasaun, apoiu emerjénsia no rekuperasaun.

Nia afirma, giaun Nasaun Unida nian  nu’udar parte ida  mós hanesan defeza sivíl ne’ebé ninia atuasaun haree mós ba dezastre naturaís no apoiu umanitária.

“Ita seidauk tama ba iha ICDO ofisiálmente iha organizasaun ne’e, maibé iha futuru kuandu ita haree vantajen ba ita Timor-Leste  bele tama,’’ Superintendente Xefe, Ismael Babo hateten hodi responde ba Agência Tatoli iha nia kna’ar fatin, kinta (04/03).

Nia hateten, bainhira atu tama ba organizasaun mundiál ida prepara uluk kondisaun ho rekizitu sira, maibé presiza halo estudu didi’ak  no reprezenta Estadu nia polítika téknikamente loke odamatan ba organizasaun saida de’it.

Nia dehan, mezmu TL seidauk tama ba membru ICDO maibé Timor-Leste mós  hola parte  ba Nasaun Unida  no organizasaun protesaun sivíl ba país membru Komunidade Lian Portugeza (CPLP)  ne’ebé hala’o kooperasaun servisu iha area dezastre naturaís  ho ninia konseitu ne’e liga ba defeza sivíl.

“Organizasaun internasionál sira hanesan, WordVision, Caritas, Care Internasionál, Cruz Vermella ho sira seluk mós tau atensaun maka’as hodi fó apoiu Timor-Leste hanesan  prátika hosi  defeza sivíl ba asaun umanitária ho dezastre naturaís ho tipu oi-oin ne’ebé ninia prátika defeza sivíl halai liubá ida-ne’e hanesan mós protesaun sivíl,” Ismael Babo hateten.

Kona-ba kooperasaun TL  ba iha   organizasaun  protesaun sivíl CPLP, Ismael Babo, liatun dehan, durante ne’e nasaun sira membru fasilita formasaun, kompartilla asuntu  dezastre naturaís, estudu komparativu no sira seluk.

Diretór Jerál SEPS, Ismael Babo, informa SEPS mós daudaun halo hela aproximasaun atu integra ba organizasaun ASEAN Humanitarian Center (AHA) ninia baze iha Indonézia ne’ebé integra hosi nasaun ASEAN hotu-hotu ko’alia kona-ba  update klima no dezastre naturaís, halo previzaun tempu  inklui asisténsia sira iha nivel ASEAN.

“Agora iha faze para ita alínea ho integrasaun Timor-Leste ba ASEAN, se tama ona, automatikamente ita mós tama iha laran ona ne’ebé daudaun Timor-Leste hanesan nasaun parte observadór iha AHA,” nia esplika.

Nia dehan, liuhosi enkontru iha Ministériu Negósiu Estranjeiru (MNEC) ho ASEAN parte tékniku ba kestaun protesaun sivíl submete ona rekizitu sira hanesan lejizlasaun no preparasaun sira seluk.

Nia hateten, iha lei protesaun sivíl ne’ebé  hetan ona promulgasaun hosi Prezidente Repúblika  prevee mós ba apoiu exterior ka kooperasaun sira iha area protesaun sivíl ninian tanba ne’e kooperasaun ne’ebé Timor-Leste hala’o  iha area protesaun sivíl tantu iha nivel internasionál no rejionál importante  hodi bele servisu hamutuk tanba mundu ohin loron loke an ba malu hodi servisu mútua ba atinje prosperidade povu nian.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here