DILI, 05 marsu 2021 (TATOLI)-Sekretáriu Estadu Protesaun Sivíl (SEPS), Joaquim José Gusmão dos Reis Martins, kontinua enkoraja mediadór sira hosi Diresaun Nasionál Prevensaun Konflitu Komunitaria (DNPKK) atu kontinua presta servisu ba prevensaun konflitu iha komunidade.
Liuhosi serimónia enserramentu formasaun kona-ba prevensaun konflitu mediadór/a sira iha salaun enkontru Ministériu Interiór (MI),Vila Verde, Dili, sesta (05/03), Sekretáriu Estadu Joaquim José Gusmão dos Reis Martins, hatutan presiza formasaun beibeik nune’e bele hasa’e liután koñesimentu sai mediadór bainhira hamutuk ho komunidade rezolve konflitu ruma tanba evolusaun iha komunidade sempre iha mudansa hosi tempu ba tempu.
“Hato’o parabens ba ita boot sira ne’ebé mak tuir ona formasaun atu sai mediadór bele kontribui iha komunidade,” Joaquim Gusmão hateten.
DNPKK halo kooperasaun ho Plan Internasionál realiza formasaun kona-ba protesaun ba labarik no prevensaun konflitu mediadór sira hamutuk na’in-25, kompostu hosi mane na’in-13 no feto na’in-12.
Matéria ba formasaun ne’e foku ba sensivel jéneru, feto paz no seguransa, protesaun labarik, prevensaun konflitu, rekolla dadus hosi konflitu sira.
Diretór Nasionál Prevensaun Konflitu Komunitária, António Viegas, hateten objetivu hosi formasaun ne’e atu reforsa liután koñesimentu mediadór sira nian oinsá halo diálogu hodi rezolve konflitu ruma mosu iha komunidade hodi bele kontribui harii paz no estabilidade.
DNPKK iha ninia mediadór iha munisípiu hotu ho nia papél oinsá aprosima iha komunidade atu rezolve konflitu ruma mosu.
Natureza mediasaun nian maka mediadór sira fasilita de’it kondisaun ba mediasaun hodi rezolve disputa ruma. Mediadór sei la impoin buat ruma to’o hetan solusaun ne’ebé tuir parte rua nia hakarak.
Jornalista : Nelson de Sousa
Editór : Francisco Simões
