Estudante peskizadór UNTL, hasai foto hamutuk ho Diretór Nasionál Dezenvolvimentu Mídia Lokál interinu hosi SEKOMS, José da Costa, reprezintante UNiCEF no Dirijente departementu Komunikasaun Sosiál, iha edifísiu Caicoli, sesta (05/03). Imajen/Natalino Costa

DILI, 05 marsu 2021 (TATOLI)—Estudante Universidade Nacional Timor Lorosa’e (UNTL) halo peskiza relasiona ho asesu komunidade ba rádiu, ne’ebé halo ba rádiu komunidade neen no rezultadu hatudu komunidade 65% mak seidauk asesu rádiu ho di’ak.

Estudante Departamentu Komunikasaun Sosiál UNTL no Peskizadór, Emerenciana de Jesus Martins, hateten peskiza ne’e liuhosi kooperasaun ho United Nations International Children’s Emergency Fund (UNICEF) hamutuk ho Sekretaria Estadu Komunikasaun Sosiál (SEKOMS) liuhosi programa estájiu iha rádiu komunidade.

“Ami-nia peskiza ne’ebé maka halo iha rádiu komunidade neen, tuir dadus, ema rona rádiu hamutuk 230 no sira ne’ebé la rona rádiu hamutuk 454. Ida-ne’e, ami konverte ba persentajen ema ne’ebé rona rádiu 35% no ema ne’ebé maka la rona rádiu 65%,” Peskizadór informa hafoin ramata aprezentasaun peskiza iha UNTL, Caicoli, sesta ne’e.

Peskiza ne’e halo ba rádiu komunidade neen hanesan Viqueque, Baucau, Same, Ermera, Manufahi no Manatuto, hahú iha novembru 2020 ho durasaun loron 22 no uza aplikasaun KoBo Toolbox no Kobo Collection.

Aleinde ne’e, ekipa la’ós de’it halo peskiza ba ema ne’ebé asesu rádiu, maibé halo mós peskiza ba ema ne’ebé asesu ba rede sosiál.

“Ema ne’ebé maka uza rede sosiál 42% no ema ne’ebé maka la uza rede sosiál maka 58%,” nia akresenta.

Iha fatin hanesan, Diretór Nasionál Dezenvolvimentu Mídia Lokál interinu hosi SEKOMS, José da Costa, konsidera aprezentasaun peskiza ne’e di’ak tebes tanba bele hatudu númeru rona-na’in.

Nia konsidera, peskiza hanesan sasukat ida ba Governu liuhosi SEKOMS atu hadi’a kualidade no kuantidade programa atubele atrai rona-na’in sira.

“Ita kontinua fó kapasitasaun ba sira ein termu tékniku no akompañamentu. Tinan ne’e ita mós tau osan oituan atu kontinua fó kapasitasaun iha programasaun no produsaun informasaun,” nia hatutan.

Nia dehan, tuir kontratu subvensaun ba rádiu komunidade sira, integra mós programa ba rádiu hanesan drama, talk show, notísia no seluk tan.

Nune’e mós, Xefe Komunikasaun UNICEF, Rukshan Ratnam, organizasaun mundiál ne’e iha kompromísiu desde inísiu atu fó apoiu ba estudante sira iha Departamentu Komunikasaun Sosiál UNTL liuhosi halo programa ba rádiu no peskiza.

Seremónia ne’e hetan partisipasaun hosi Reprezentante UNICEF, Reprezentante Embaixadór Japaun, inklui Diretór Departamentu Komunikasaun Sosiál UNTL, Marcelino Ximenes Magno.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here