Embaixadór Portugál iha Timor-Leste, José Pedro Machedo Vieira hasoru malu ho Prezidente Parlamentu Nasionál, Aniceto Longuinhos Guterres Lopes. Imajen/Relasaun Públika Parlamentu Nasionál.

DILI, 05 marsu 2021 (TATOLI)–Prezidente Parlamentu Nasionál, Deputadu Aniceto Longuinhos Guterres Lopes no Embaixadór Portugál José Pedro Machedo Vieira, sesta ne’e, diskute kooperasaun iha área dezenvolvimentu rekursu umanu tanba Timor-Leste hasoru dezáfiu boot iha área refere.

Prezidente Parlamentu Nasionál ne’e rekoñese Timor Leste enfrenta dezáfiu boot iha dezenvolvimentu rekursu umanu iha kualkér área, tanba ne’e pertinente ba Timor-Leste atu kontinua kapasita-aan iha área rekursu umanu.

Prezidente Parlamentu Nasionál agradese ba Estadu Portugál tanba durante ne’e, kooperasaun entre Parlamentu Nasionál Timor-Leste ho Asemblea Repúblika Portugueza di’ak tebes.

Embaixadór Portugál iha Timor-Leste, José Pedro Machedo Vieira hasoru malu ho Prezidente Parlamentu Nasionál, Aniceto Longuinhos Guterres Lopes. Imajen/Relasaun Públika Parlamentu Nasionál.

“Ami hakarak halo luan tán kooperasaun entre Parlamentu Timor-Leste no Asembleia Portugeza nian, liuliu iha área dezenvolvimentu rekursu umanu. Posibilidade bele iha bolsu estudu ba funsionáriu no tékniku parlamentu nian no bele mós kooperasaun iha área sira seluk,” Prezidente Parlamentu Nasionál, ko’alia hafoin termina enkontru ho Emabaixadór Portugál José Pedro Machedo Vieira, iha uma fukun PN.

Nia hatutan, reuniaun traballu ne’e hodi loke oportunidade no posibilidade kooperasaun hosi Portugál ba Parlamentu Nasionál Timor-Leste nian.

“Durante tempu naruk, Portugál nu’udar nasaun amigu ne’ebé besik ho Timor-Leste no sira hatudu duni sira-nia apoiu hosi Portugál mai Parlamentu Timor-Leste nian. Portugál durante ne’e apoiu barak, liuliu iha Governu nian,” nia agradese.

Nune’e mós Embaixadór Portugal, José Pedro Machedo Vieira hateten, Portugál kapasita ona kuñesimentu funsionáriu sira Parlamentu Nasionál liuhosi formasaun língua portugeza, finansa públika no seluk tán.

“Enkontru ho Prezidente Parlamentu Nasionál ko’alia kona-ba kooperasaun nasaun rua nian, espesialmente kooperasaun ne’ebé eziste ona dezde uluk entre Parlamentu Nasionál no Asembleia Portugál, inklui pontu kolaborasaun sira seluk,” nia dehan.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here