Ministru Finansa, Rui Augusto Gomes no Governadór BCTL, Abraão Vasconselos, lansasistema pagamentu impostu liuhosi ATM P24, iha salaun MF, Aitarak-laran, sesta (05/03). Imajen TATOLI/António Gonçalves

DILI, 05 marsu 2021 (TATOLI)—Ministériu Finansa (MF) hamutuk ho Banku Sentrál Timor-Leste (BCTL, sigla portugés) halo lansamentu ba pagamentu impostu liuhosi Automated Teller Machine (ATM) P24.

Pagamentu impostu iha tipu taxa haat hanesan impostu rendimentu, retensaun no fonte, salariál no impostu serbisu.

Ministru Finansa, Rui Augusto Gomes, konsidera plataforma pagamentu impostu liuhosi mákina ATM24 (e-payment) hanesan mekanizmu di’ak ida atu fasilita kontribuinte, ne’ebé bainhira halo pagamentu ba tipu taxa haat, sei ko’a osan iha konta bankária ho valór $0,50.

Ministru Finansa, Rui Augusto Gomes. Imajen TATOLI/António Gonçalves

“Ha’u sente orgullu tebes nu’udar Ministru Finansa bele lansa pagamentu impostu via ATM P24 nu’udar mekanizmu atu fasilita kontribuinte bele kumpre obrigasaun fiskál liuhosi plataforma online, ne’ebé la presiza forma iha banku atu selu. Ida-ne’e hanesan konkista hosi esforsu koletivu Autoridade Tributária no Ministériu Finansa,” Ministru Rui hateten iha ámbitu lansamentu plataforma pagamentu impostu liuhosi mákina ATM P24, iha salaun MF, Aitarak-laran, sexta ne’e.

Kondisaun antes ne’e, kontribuinte sira forma iha banku komersiál hodi halo pagamentu ne’ebé han tempu no kustu adisionál.

Tuir governante ne’e, plataforma online ne’e dezeñu hosi espesialista timor-oan rasik.

“Governu tau fiar ba timor-oan sira atu kontinua serbisu di’ak. Ha’u mós hakarak salienta pagamentu impostu liuhosi ATM P24 foin mak akontese iha istória Autoridade Tributária no iha futuru ATM P24 sei integra iha servisu eletróniku (e-services) ne’ebé lansa ona iha tinan kotuk, nune’e kontribuinte sira bele halo pagamentu online, tanba ne’e espera sei akontese iha tempu badak,” nia hatutan.

Lansamentu sistema pagamentu impostu liuhosi ATM P24, iha salaun MF, Aitarak-laran, sesta (05/03). Imajen TATOLI/António Gonçalves

Tuir informasaun hosi Autoridade Tributária, plataforma e-service konsege benefisia ona kontribuinte hamutuk 4.000 no iha tempu hanesan integra ona funsaun e-feeling, e-request no e-payment.

Iha fatin hanesan, Governadór BCTL, Abraão Vasconselos, hateten plataforma pagamentu impostu ne’ebé foin ofisializa iha tipu haat de’it, enkuantu iha futuru bele permite mós autoridade hosi Eletricidade de Timor-Leste (EDTL) disponibiliza plataforma hodi integra ho sistema P24 atu permite populasaun sira sosa pulsa liuhosi sistema eletróniku.

“La’ós ona ita ko’alia kona-ba integrasaun sistema Governu ho inter-bankária, maibé oinsá atu estende utilizasaun sistema pagamentu nasionál ne’ebé mak Banku Sentrál hamutuk ho instituisaun bankária iha Timor-Leste implementa,” nia dehan.

Governadór BCTL, Abrãao de Vasconselhos. Imajen TATOLI/António Gonçalves

Sistema P24 la’ós integra de’it infraestrutura sistema setór bankária, maibé ita konsege integra hotu sistema hosi instituisaun naun bankária sira.

Sistema P24 ofisializa iha 18 dezembru 2018, ne’ebé momentu ne’ebá foku prinsipál liu atu integra ATM banku komersiál hotu iha Timor-Leste, exeptu ANZ tanba infraestrutura antes ne’e integra ona ho sistema P24.

Iha futuru halo pagamentu eletróniku liuhosi ATM la’ós de’it ba taxa, maibé pagamentu ba servisu públiku, ne’ebé entidade Estadu sira hakarak introdús sistema ne’e.

Servisu foun pagamentu taxa ne’e importante tanba hola parte ida ba dezenvolvimentu switch nasionál ne’ebé sei permite kliente ho kartaun P24 sira hosi BNU, BRI no BNCTL atu selu taxa ne’ebé eletrónikamente liuhosi ATM P24 sein presiza vizita banku.

Sistema ne’e liga ho Banku Sentrál nia sistema likidasaun R-TIMOR atu nune’e taxa sira ne selu diretamente ba konta Governu nian iha Banku Sentrál.

Atubele hala’o servisu ne’e funsiona, banku sira sei persiza husu ba klientes atu troka kartaun ATM ba kartaun foun P24.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here