Primeiru-Ministru Taur Matan Ruak, akompaña hosi Ministru Obra Públika, Salvador Eugênio dos Reis Soares Pires no entidade relevante halo teste materiál estrada, iha área Matadoru, sesta (05/03). Imajen TATOLI/António Gonçalves

DILI, 05 marsu 2021 (TATOL)—Ministériu Obra Públika (MOP) komprometidu moderniza ekipamentu kontrola kualidade projetu infraestrutura sira tanba daudaun ekipamentu sira sei manuál no la sufisiente garante kualidade projetu infraestrutura.

Ministru Obra Públika, Salvador Eugênio dos Reis Soares Pires, hateten bainhira atu halo avaliasaun garante kualidade investimentu, presiza iha aparelu serbisu laboratóriu sufisiente atu asegura inspesaun.

“Iha tinan kotuk MOP konsege halo ona akizasaun no hatama ekipamentu hosi Indonézia hodi halo teste dijitál ba estrada, maibé ekipa atu mai fó formasaun ba tékniku sira labele mai tanba situasaun COVID-19. Maski nune’e, ami sei esforsu hodi sira bele mai Timór, nune’e bele hahú kapasita tékniku laboratóriu atubele opera mákina kontrola kualidade estrada, liuliu ba obra ne’ebé ninia orsamentu empréstimu,” Ministru Salvador tenik iha Balide, sesta ne’e.

Notísia relevante: PM Taur asiste teste materiál ba estrada hosi Timor Rock

Tuir governante ne’e, MOP iha nesesidade ba ekipamentu aparelu hodi ajuda tékniku sira kontrola di’ak liután kualidade obra sira.

“Ita tenke iha duni ekipamentu aparelu no ekipa ida halo serbisu inspesaun ba kualidade obra sira. Ekipamentu durante ne’e iha maibé la sufisiente no sei manuál de’it, tanba ne’e presiza moderniza ekipamentu,” nia akresenta.

Enkuantu, iha atividade teste ba materiál estrada hosi produtu Timor Rock nian ne’ebé partisipa diretamente hosi Primeiru-Ministru, Taur Matan Ruak, nota katak ekipamentu ne’ebé mak ekipa hosi MOP no Ajénsia Dezenvolvimentu Nasionál (ADN) uza ba teste iha estrada metru 100 han tempu oras rua.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here