Grupu Mulherés Parlamentár Timor-Leste (GMPTL). Imajen/Espesiál

DILI, 05 marsu 2021 (TATOLI)—Grupu Feto Parlamentár Timor-Leste (GMPTL-sigla portugés) kondena makaas aktu krime omisídiu no insensu ne’ebé akontese iha Munisípiu Bobonaro, ne’ebé komete hosi autór DSP (la’en) hakotu DFF (feen) nia vida.

“Grupo Feto Parlamentár Timor-Leste kondena makaas aktu krime omisídiu no insestu, ne’ebé mak komete hosi autór ho inisiál DSP hodi rezulta hakotu vítima nia vida (autór nia kaben rasik) ho inisial MFF mate iha fatin, iha loron 3 fulan-marsu tinan 2021, iha sira-nia rezidénsia iha suku Batugade,” Prezidente GMPTL, Deputadu Lídia Norberta dos Santos Martins, informa liuhosi konferénsia imprensa iha Parlamentu Nasionál, sesta ne’e.

Haree ba krime omisídiu ida-ne’e, GMPTL ho firme ezije ba PNTL no Ministériu Públiku atu fóti asaun lalais, urjente no aselera hatama autór ba iha prizaun preventiva.

Enkuantu hein prosesu julgamentu ho razaun haree ba historiál kazu ne’e, autór nunka kumpre ho loloos no viola Termu Identidade Rezidénsia (TIR) ne’ebé hatún hosi tribunál.

Bainhira autór krime livre hosi prizaun, bele akontese tán aktu violénsia seluk hasoru nia oan sira, no ba família matebian sira-nia vida sente la seguru enkuantu autór DSP la tama prizaun.

Aproveita oportunidade ida-ne’e, GMPTL rekomenda ba Ministériu Solidariedade Sosiál no Inkluzaun atu tau matan ba oan-kiak vítima na’in-tolu ne’ebé nia inan husik hela.

Tuir infórmasaun ne’ebé maka GMPTL rekolla katak durante ne’e matebian DFF maka sustenta mesak nia oan sira. Ho nune’e GMPTIL husu intervensaun MSSI atu fó asisténsia sosiál no asegura kontinuidade ba edukasaun hodi garante kondisaun futuru ne’ebé dignu ba oan ki’ak sira.

GMPTL enkoraja ba vitima hosi kualkér violénsia atu ko’alia sai ka relata ba parte kompetente hodi bele defende sira-nia direitu no asegura tuir prosesu justisa ne’ebé vigora iha rai doben Timor-Leste.

GMPTL mós husu ba autoridade kompetente tenke tetu didi’ak desizaun antes hatun medida koasaun TIR ba autór ho tipu krime grave, tanba husi kazu ida-ne’e hatudu katak medida TIR fó espasu ba autór hodi halo movimentu livre, ameasa intensionál no sempre kria inseguransa ba vítima sira-ne’ebé la espera no ikus liu hakotu ema ida-nia vida.

Ikus liu, GMPTL husu ba sidadaun hotu-hotu atu respeita ema idak-idak nian direitu ba vida no direitu ba livre hosi kualkér aktu violénsia iha família, sosiedade no nasaun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here