Komunidade balun iha área Dili-laran mós sei difisil tebes asesu bee-moos. Imajen Tatoli/Antonio Gonçalves.

DILI, 05 marsu 2021 (TATOLI)—Koordenadora Working Women’s Center Timor-Leste (WWCTL), Ricar Pascoela, hatete papél feto importante tanba feto hanesan inan edukadora no jestora iha família no sosiedade maibé iha nasaun feto hanesan mákina ekonómia nian ida.

Notísia Relevante: Loron Mundiál Ba Feto valoriza feto-nia direitu

“Feto nia papél mak edukadora no jestora iha família, sosiedade no nasaun nia-laran tanba feto hanesan mákina ekonómia direta no indireta ba prosesu dezenvolvimentu iha nasaun ida,” Ricar Pascoela hateten ba Agência TATOLI relasiona ho komemorasaun Loron Mundiál Ba Feto ne’ebé mundu selebra iha kda loron 08 marsu, iha salaun Rede Feto, Obrigado Barrack, Matadouru, Dili, kinta ne’e.

Membru Konsellu Diretivu Rede Feto ne’e hatutan, iha Timor-Leste dala barak feto empregada doméstika barak maibé sira sempre buka meiu hodi oinsá mak bele proteje sira-nia família liuhosi dalan saida de’it mak sira sente bele.

“Ezemplu ha’u hanesan feto ativista ida iha organizasaun feto ida no bainhira sai feto ativista, ha’u sempre apoiu no fó formasaun liuhosi ha’u-nia membru hodi ita-nia maluk feto sira-ne’ebé mak ladún iha koñesimentu eh lahatene nia-direitu fundamentál iha empreza, tantu iha privadu ka doméstika. Ida-ne’e, hanesan iha sosiedade no nasaun ida tanba ha’u mós bele promove sira,” nia dehan.

Nia hateten, presiza valoriza no tane aas feto sira-nia direitu no dever iha servisu fatin maibé valorizasaun ne’e tenke hahú hosi família to’o iha sosiedade.

“Ita hahú valoriza feto sira-nia servisu, la’ós esklui feto sira hosi servisu ne’ebé mak sira bele hala’o. Valoriza sira la’ós halo sira-nia saláriu diferensa ho saláriu mane sira-nian, lae. Labele haree ba sira hanesan mane, nune’e saláriu tenke tau boot, ne’e la loos no ida-ne’e sei labele akontese ba feto sira. Tanba, ita iha lei laboral 4/2012 hateten tane aas feto nia direitu no dever,” nia esplika.

Membru Rede Feto ne’e hateten, bainhira feto mak halo servisu hanesan mós mane sira entaun tenke tau direitu saláriu ne’ebé mak hanesan no labele haree ba feto ka mane.

Tempu agora ne’e, nia dehan, valoriza feto sira atu oinsá mak promove ba malu atu prinsípiu igualdade bele aplika iha sosiedade no nasaun ida-ne’e.

“Oinsá ita feto no mane iha direitu hanesan iha fundamentu justisa nian no ita bele asegura katak feto hahú hosi uma-laran to’o iha servisu fatin. Ida-ne’e mak bainhira feto iha sosiedade katak feto mós bele no brani. Tanba bainhira iha uma-laran ho valór ne’ebé mak di’ak mak iha sosiedade no nasaun mós sei hautudu valór di’ak,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here