Ema deskoñesidu sobu rezidénsia pasiente COVID-19 ho inisiál MCA nia uma iha Aldeia Onu-Laran, Suku Maudemu, Postu Administrativu Tilomar, Munisípiu Covalima. Imajen Tatoli/Eugénio Pereira

COVALIMA, 05 marsu 2021 (TATOLI)-Família uma-kain ida ne’ebé pozitivu COVID-19 iha Aldeia Onu-Laran, Suku Maudemu, Postu Administrativu Tilomar, Munisípiu Covalima, sira-nia sasán uma-laran lakon daudaun ona.

Pasiente pozitivu COVID-19 ho inisiál MCA ho nia família evakua ona mai Dili hodi submete ba tratamentu iha sentru izolamentu Vera Krús, Dili no tanba uma mamuk taka metin,  kuarta (03/03), purvolta tuku 01:oo madrugada, ema deskoñesidu aproveita hodi foti ona sasán balun iha uma-laran pasiente nian.

Notísia Relevante : MS rejista tan ema rua pozitivu COVID-19, pasiente ida rekuperadu

Gaudencio Amaral m nu’udar sasin no viziñu dehan, nia sente triste tebes hafoin rona manu halikar iha uma-laran, sira lori lámpada hodi ba lenu buka tuir autór deskoñesidu sobu ona odamatan no janela hodi sai sasán hosi uma-laran.

“Kalan ne’e ami rona manu halikar lian maka’as, maka ami foti lámpada ba leno haree ema sobu ona odamatan no janela hodi tama fó tiha ona sasán no sira halai liu ona. odamatan no janela hosi nakloke hela,” Gaudencio  hateten ba jornalista iha Aldeia Onu-Laran- Tilomar, Covalima, sesta ne’e.

Hafoin akontesimentu ne’e, nia parte koordena kedas ho família balun, inklui kontaktu xefe aldeia no xefe suku hodi bolu Polísia Eskuadra Tilomar to’o kedas ba rezidénsia hodi rekolla dadus.

Notísia Relevante : COVID-19 hosi Fatumean, rejista tan kazu foun haat

Parte PNTL inklui autoridade suku deside seidauk bele tama ba rezidénsia laran hodi hala’o investigasaun, tanba tenke hein uma-nain, inklui ekipa médiku to’o agora seidauk lori ai-moruk ba dezinfeta rezidénsia ne’e.

Gaudencio  mós kontaktu via telefone ba vítima MCA hodi fó hatene kazu ne’e no vítima MCA rasik sente triste.

Gaudencio nu’udar viziñu di’ak ne’ebé hetan fiar hosi MCA hodi tau matan ba ninia uma no ajuda fó hahán ba MCA nia fahi lima ne’ebé husik iha luhan laran.

Iha fatin hanesan, reprezentante família, Adriano da Costa, sente triste no husu ba parte polísia atu halo investigasaun kle’an.

Adriano dehan, molok MCA ho nia kaben oan sira arranka ba hala’o tratamentu saúde iha Sentru Izolamentu Vera Krús, Dili, MCA kontaktu katak, nia rai hela foos karon saka 10 no ema foti ona foos balun, inklui tais kultura Timor ne’ebé rai iha armáriu laran.

“Ami husu ba autoridade polísia sira tenke mai investiga,” nia hateten hodi haktuir mós katak MCA rasik kontaktu ba nia família atu koordena ho parte polísia asegura de’it maka ninia dokumentu servisu nian ne’ebé rai hela iha uma laran.

Iha parte seluk, Xefe Aldeia Onu-Laran- Tilomar, Mariano de Fatima, rekoñese ema deskoñesidu sobu duni MCA nia uma hodi foti sasán uma laran.

Xefe Aldeia hamutuk ho família sira aprezenta ona keixa ne’e ba parte PNTL Tilomar, maibé PNTL rasik seidauk bele halo investigasaun, tanba tenke konfirma ho uma na’in hodi buka hatene sasán saida de’it maka rai iha uma laran.

Xefe Aldeia Mariano sei koordena ho PNTL no ekipa Ministériu Saúde Covalima hodi dezinfeta tiha uma laran no sei halo investigasaun.

Pasiente COVID-19 ho inisiál  MCA ho nia kaben SC, tinan 35, no nia oan feto ida SCA, tinan 10, ho nia oan mane ki’ik ida agora hala’o tratamentu saúde iha Sentru Izolamentu Vera Krús, Dili.

Iha parte seluk, Komandante Polisia Munisipiu Covalima Superintendente, António Maria de Sá, informa seidauk bele fó komentáriu, tanba sei hein relatóriu hosi Polísia Eskuadra Tilomar hodi halo investigasaun kle’an ba kazu ne’e.

Jornalista        : Eugénio Pereira

Editór              : Francisco Simões

HAKEREK NO HATÁN

Please enter your comment!
Please enter your name here