Diretór Nasionál Promosaun Dezenvolvimentu Mídia Lokál, Paulino Quintas. Imajen/Natalino Costa

DILI, 05 marsu 2021 (TATOLI)–Diretór ba Diresaun Nasionál Promosaun Dezenvolvimentu Mídia Lokál (DNPDML), Paulino Quintas, hateten durante nia mandatu, hakarak diversifika meiu komunikasaun sosiál iha munisípiu sira, nune’e bele kontribui ba polítika Governu hanesan desentralizasaun no poder lokál.

“Rádiu Komunidade ita kontinua apoiu, maibé ita tenke diversifika meiu komuikasaun sosiál, ne’ebé la’ós rádiu de’it maibé mós haree posibilidade koordena di’ak liu tan ba krisaun mídia ne’ebé kontribui ba prosesu dezenvolvimentu iha munisipiu, tanba polítika Governu kona-ba desentralizasaun sei mosu iha tempu badak,” Diretór DNPDML hateten hafoin seremónia pose iha salaun Prezidénsia Konsellu Ministru, Palásiu Governu, sesta ne’e.

Notísia relevante: Pose Diretór DNPDML, SEKOMS enkoraja elabora programa kobre munisípiu hotu

Tanba ne’e, Dirijente foun ne’e komprometidu hamutuk ho ninia ekipa hodi halo planu di’ak ba tinan ne’e.

“Ita sei halo konsultasaun, mídia saida maka presiza harii iha munisípiu no oinsá ita atu estabelese mídia iha munsípiu sira,” nia akresenta.

Nia dehan, durante mandatu sei planu halo kapasitasaun rekursu umanu, liu-liu ba jornalista sira ne’ebé serbisu iha rádiu komunidade sira.

“Durante ne’e Sekretaria Estadu Komunikasaun Sosiál (SEKOMS) fó subvensaun públika ba Rádiu Komunidade hodi halo programa ba rádiu atu serví nafatin komunidade,” nia hatutan.

Orsamentu 2021 ba DNPDML hamutuk $70.820, ne’ebé hanesan diresaun foun iha tinan ne’e, ne’ebé antes hanesan Sentru Rádiu Komunidadade (CRC, sigla portugés), no diresaun ne’e tutela ba SEKOMS.

Diresaun ne’e mosu atu dezenvolve mídia iha munisípiu, hanesan polítika SEKOMS ne’ebé hakarak konsentra hamutuk autoridade munisipál dezenvolve sentru mídia atu diversifika meiu komunikasaun soiál iha área rurál.

DNPDML halo programa boot tolu hanesan kontinua fó asisténsia ba Rádiu Komunidade liuhosi transferénsia públika, inísia implementasaun mídia lokál no programa Naroman ba Suku.

Antes ne’e, SEKOMS liuhosi DNPDML fó apoiu fundu hosi transferénsia públika ba Rádiu Komunidade 16 iha Timór laran tomak, ne’ebé kada rádiu simu $8.000 hodi finansia atividade produsaun notísia lokál, notísia online, talk show, produsaun teatru ka drama no produsaun mensajen badak sira, durante tinan ida.

Rádiu komunidade 16 ne’ebé hetan transferénsia públika maka hanesan Rádiu Komunidade Tokodede Liquiçá, Rádiu Komunidade Comoro, Rádiu Komunidade Cova Taroman Suai, Rádiu Komunidade Atoni Lifau Oé-cusse, Rádiu Komunidade Vox Populi Lospalos, Rádiu Komunidade Mauloko Maubisse, Rádiu Komunidade Manukoko Atauro, Rádiu Komunidade Ili-Wai Manatuto, Rádiu Komunidade 1912 Same, Rádiu Komunidade Lian Matebian Baucau, Rádiu Komunidade Kolelemai Sahe Bucoli, Rádiu Komunidade Rai-Husar Aileu, Rádiu Komunidade Povu Viqueque, Rádiu Komunidade Kafe Ermera, Rádiu Komunidade Lian Tatamailau Ainaro, no Rádiu Komunidade Maliana.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here