Xefe Suku Laisorulai de Baixo, Postu Administrativu Quelicai, Munisípiu Baucau, Julio Farkhus Pinto. Imajen/Espesiál.

DILI, 04 marsu 2021 (TATOLI)—Xefe Suku Laisorulai de Baixo, Postu Administrativu Quelicai, Munisípiu Baucau, Julio Farkhus Pinto, husu Governu atu aselera lalais konstrusaun Segundu Jardin dos Herois Dubuwai, atu nune’e bele haloot restu mortál sira ho dignu. 

Notísia Relevante: Loron Nasionál Veteranu fó esperansa ba jerasaun foun sira

Julio Farkhus Pinto hateten, Segundu Jardin dos Herois ne’ebé lokaliza iha Aldeia Sauakasa, Suku Laisorulai de Baixo, Postu Administrativu Quelicai, Munisípiu Baucau ne’e halo ona lansamentu iha tinan 2014 maibé to’o agora konstrusaun refere seidauk finaliza.

“Restu mortál ne’ebé mak agora dadaun tau hela iha área Dubuwai, ami rekolla ne’e iha 2013 tau iha uma mahon provizoriu ida-nia okos. Maibé, momentu uma ne’e mós halo urjente de’it entaun agora kalen sira-ne’e dodok hotu ona. Tempu udan bele fó impaktu ba restu mortál sira-ne’ebé haloot iha uma ne’e nia okos bá. Entaun, ami husu ba Governu liuhosi Ministru Asuntu Kombatente Libertasaun Nasionál, bele prosesa lalais ba konstrusaun Jardín Dubuwai, nune’e bele haloot mate-ruin sira-ne’e ho dignu,” Julio Fakhur Pinto hataten hafoin partisipa semináriu komemorasaun Loron Nasionál Veteranu ne’ebé realiza iha Postu Administrativu Quelicai, Munisípiu Baucau, ne’ebé Agência TATOLI asesu, kinta ne’e.

Julio Fakhur Pinto hatutan, restu mortál ne’ebé komunidade inisiativa rekolla ne’e hamutuk 499 no entre restu mortál sira-ne’e kompostu hosi militár no kuadru sivíl.

Kona-ba xefe suku nia preokupasaun sira-ne’e, Ministru Asuntu Kombatente Libertasaun Nasionál (MAKLN), Júlio da Costa Sarmento “Meta Malik” hatán, Governu sei dignifika no valoriza restu mortál sira-ne’ebé komunidade rekolla no rai hela iha uma mahon Dubuwai ne’e no sei haloot iha fatin ne’ebé dignu.

“Ha’u dehan ba imi, imi-nia preokupasaun sira-ne’e hotu fó ba ha’u, ha’u sei lahaluha, ha’u sei mai haree hodi hadi’a fatin ba jardin dos herois ne’e. Tanba ne’e, tusan ba ita hotu. Tanba, ruin ho raan ba ke’e tiha hosi rai no rekolla ona ne’e, atu dignifika no valoriza sira, la’ós ke’e mai hada hela de’it. Tanba ne’e, ita sei haloot sira ho dignu,” nia dehan.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here