Enkontru SEFOPE no Embaixada Korea Súl iha Timor-Leste, iha edifísiu Caicoli, kinta (04/03). Imajen/Mídia SEFOPE

DILI, 04 marsu 2021 (TATOLI)–Emabaixadór Korea Súl iha Timor-Leste, Kim Jeong-Ho, hateten durante kooperasaun nasaun rua hodi haruka traballadór timor-oan ba serbisu iha Korea Súl, iha traballadór na’in-sia mak lakon vida.

“Tuir dadus ne’ebé ami iha, traballadór timor-oan ne’ebé maka mate iha Korea Súl hamutuk ema na’in-sia,” Diplomata koreanu ne’e informa ba jornalista sira, hafoin enkotru ho Sekretáriu Estadu Formasaun Profisionál no Empregu, Alarico do Rosário iha edifísiu Caicoli, kinta ne’e.

Notísia relevante: Traballadór Timor-oan Ida Iha Korea Súl Hakotu-Iis

Bazeia ba dadus hosi Sekretaria Estadu Formasaun Profisionál no Empregu (SEFOPE), traballadór timor-oan ne’ebé serbisu iha Korea Súl hahú hosi tinan 2009 to’o 2020 hamutuk 3.696 no serbisu iha área peska, fábrika, no agrikultura.

Iha sorin seluk, Sekretáriu Estadu Alarico do Rosario, hateten Governu liuhosi SEFOPE ho koordenasaun hosi Ministériu Negósiu Estranjeiru no Kooperasaun (MNEK) iha obrigasaun tau-matan nafatin ba traballadór timor-oan iha Korea Súl no Austrália.

“Ita iha Embaixadór Timor-Leste iha Korea Súl no Adidu Traballadór, tanba ne’e bainhira traballadór timor-oan ida hetan difikuldade, sira sempre tau-matan no bainhira sidadaun ida hakotu iis, maka SEFOPE iha obrigasaun halo koordenasaun ho parte Korea atu halo translasaun mate-isin mai Timor-Leste,” governante ne’e garante.

Nia haktuir, iha fulan hirak liubá, iha traballadór timor-oan ida iha Korea mak hakotu iis no Governu buka meiu hodi konsege transporta mate-isin lori mai Timor-Leste.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here