Produtu mina-nuu The Corner Store Network. Imajen/ The Corner

DILI, 04 marsu 2021 (TATOLI)—Ministériu implementadór programa Cesta Bázika kontratu ona kompañia lokál halo kompra ba produtu Cesta Bázika ka sai fornesidór, bazeia ba kapasidade finanseira hodi distribui ba komunidade iha territóriu tomak.

Tanba ne’e, kompañia lokál, The Corner Store Network Dili, ne’ebé kompostu hosi grupu feto timor-oan sira prodús mina-nuu virjen hodi fornese ba loja sira, hodi distribui ba komunidade.

Responsável Grupu The Corner Store Network Dili, Dina Sequeira, rekoñese programa rekuperasaun ekonómika Governu nian, indiretamente bele insentiva produsaun tanba antes ne’e kompañia ne’ebé halo indústria ho eskala kiik iha uma, la halo produsaun barak tanba ho limitasaun ekipamentu.

“Antes ne’e ami halo produsaun mina-nuu ho kuantidade ki’ik, maibé hafoin ami rona programa Cesta Bázika ne’e a inklui mós ho mina-nuu virjen, entaun ami ko’alia ho loja sira atu simu netik ami-nia produtu. Nune’e iha loja tolu mak prontu atu simu ami-nia produtu, tanba ne’e ami halo produsaun ho kuantidade barak hodi oferese ba loja,” Responsável kompañia informa ba Agência TATOLI, iha ninia knaar fatin, Taibessi, kinta ne’e.

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina nú, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Nune’e, kompañia lokál ne’e hatama mina-nuu iha mak loja Jacinto Foun, 8 Supermarket, no Dili Mart iha Tasi-tolu hodi oferese ba benefisiáriu Cesta Bázika.

Antes ne’e, grupu ne’e prodús mina-nuu masa litru 5, menus hosi 10 maibé hafoin oferese ba loja tolu ne’e, bele prodús masa litru 5 liu 10.

“Ami oferese ba sira-nia loja maka sira distribui ba fali komunidade liuhosi programa Cesta Bázika, ami lori ba hafoin mak sira selu, balun selu ona no balun seidauk tanba sira (loja) dehan hein Governu selu lai sira maka sira bele selu. Ami uza osan grupu nia hodi finansia atividade ne’e,” nia konta tuir.

Kompañia lokál ne’e bainhira atu prodús mina-nuu, sosa nuu hosi grupu feto sira iha postu administrativu Uatulari, munisípiu Viqueque.

Enkuantu, nuu fuan-maran  lori hosi Uatolari mai to’o iha fatin produsaun provizória iha Taibessi, ne’ebé bainhira transporta dala-ida hamutuk nuu fuan 30.000.

“Ami prontu nafatin halo produsaun mina-nuu virjen hodi fornese ba loja sira bainhira presiza iha programa nasionál Cesta Bázika,” nia subliña.

Kompañia lokál ne’ebé partisipa iha programa Cesta Bázika hamutuk 173.

Ministériu implementadór ba programa Cesta Bázika mak hanesan Gabinete Ministériu Koordenadór no Asuntu Ekonómiku (MKAE), Ministériu Turizmu, Komérsiu no Indústria (MTKI), Ministériu Agrikultura no Peska, Sekretaria Estadu Kooperativa (SEKoop), Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here