Ministru Justisa, Manuel Cárceres da Costa. Imajen Tatoli/António Gonalves.

DILI, 04 marsu 2021 (TATOLI)—Ministériu Justisa (MJ) hala’o audiénsia públika ho Komisaun A ne’ebé trata asuntu justisa no konstitusionál, kona-ba  proposta-lei Rejime Jurídiku Asosiasaun Públika Profisionál no Orden ba Advogadu sira iha Timor-Leste.

Proposta-lei rua ne’e, ida ho númeru  25/V(3a) kona-ba Rejime Jurídiku Asosiasaun Públika Profisionál no proposta-lei númeru 26/V(3a) kona-ba Orden ba Advogadu sira iha Timor-Leste.

Substánsia hosi proposta-lei rua ne’e, ida regula asosiasaun públika profisionál sira no ida seluk regula orden ba advogadu sira iha Timor-Leste.

Proposta-lei rua ne’e, plenária Parlamentu Nasionál baixa ba Komisaun A iha loron tersa 16 fevereiru 2021 liubá no oras ne’e tama iha faze audiénsia públika.

“Kuandu proposta-lei Rejime Jurídiku Asosiasaun Profisionál sai ba Lei atu regulariza asosiasan públika profisionál sira, hodi hamosu fali sira-nia orden sira,” Ministru Justisa Manuel Cárceres da Costa, informa ba jornalista sira iha Parlamentu Nasionál, kinta ne’e.

Ministru Justisa ne’e fó ezemplu, bainhira rejime ne’e sai ba Lei bele mosu tán asosisaun infermeiru, asosiasaun ba parteira sira.

“Ha’u rona dehan iha ona asosiasaun arkitetura timorense, bele mós mosu asosiasaun ba enjeñeiru sira. Ne’e hotu presiza lei ida hodi regula sira-nia ezisténsia,” nia subliña.

Nia hatutan, proposta-lei kona-ba orden ba advogadu sira tanba iha Timor-Leste advogadu privada sira kria sira-nia eskritóriu ne’e barak, Timor-Leste mós iha advogadu estranjeiru ne’ebé halo advokasia iha Timor-Leste.

Nia haktuir, komisaun fó apresiasaun ba lejizlativa ne’e tanba prenxe rekizitu legál no sei opiniaun sira sei diskute kle’an iha faze espesialidade.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here